خوست کې یوشمېر بڼوال او بزګران وروزل شول

۲۳ برګولی ۱۴۰۵ هـ.ش
۲۷ ذُوالحجّة ۱۴۴۷ هـ.ق
د خوست ولایت کرنې، اوبو لګولو او مالدارۍ ریاست تر چتر لاندې د علېشیرو او تریزیو ولسوالی کرنیزو چارو عمومي مدیریت له لوري د یادې ولسوالی یوشمېر بزګرانو او بڼوالو ته د مېوو د ننداریزو کروندو د جوړولو عملي ښوونه ترسره شوه.
په دې عملي روزنیز پروګرام کې بزګرانو ته د مېوه لرونکو بوټو د کرنې، مناسب واټن ټاکلو، د نیالګیو د کرلو معیاري لارو چارو، د اوبو لګولو منظم سیستم، د سرې استعمال اړوند مهم تخنیکي معلومات په عملي بڼه وړاندې شول. همدارنګه بزګرانو ته وښودل شول چې څنګه کولای شي د ننداریزو کروندو له لارې عصري کرنیزې لارې چارې په خپلو کروندو کې پلي کړي او د حاصلاتو کیفیت او کمیت لوړ کړي.
یاد پروګرام د بزګرانو او بڼوالو له پراخ هرکلي سره مخ شو او ګډونوالو ژمنه وکړه، چې وړاندې شوي تخنیکونه به په خپلو کرنیزو ځمکو کې عملي کوي. د دې ډول ننداریزو کروندو جوړول د کرنې په پرمختګ، د عصري میتودونو په ترویج او د بزګرانو د عوایدو په زیاتوالي کې مهم رول لري.
د خوست ولایت کرنې، اوبو لګولو او مالدارۍ ریاست هڅه کوي، چې د ورته عملي روزنیزو پروګرامونو له لارې بزګرانو ته نوي او اغېزمن کرنیز مهارتونه ورسوي، ترڅو د کرنې سکتور وده وکړي او بزګران اقتصادي پیاوړتیا ته ورسېږي.