د پکتیکا ولایت په نکه ولسوالی کې ۱۸۰ مالدارانو ته د مالدارۍ د مدیریت کڅوړې ووېشل شوې

۲۰ برګولی ۱۴۰۵ هـ.ش
۲۴ ذُوالحجّة ۱۴۴۷ هـ.ق
د پکتیکا ولایت د کرنې، اوبو لګولو او مالدارۍ ریاست په همغږۍ او همکارۍ، د اړیکو دفترله لوري د نکه ولسوالی په مرکز او اړوندو سیمو کې د مالدارۍ د مدیریت بستو د وېش پروګرام په بریالیتوب سره ترسره شو.
د یاد پروګرام موخه د مالدارۍ سکتور پیاوړتیا، د څارویو د ساتنې او پالنې د شرایطو ښه والی، د مالدارانو د ظرفیت لوړول او د هغوی د اقتصادي وضعیت ملاتړ و. د دې نوښت له لارې هڅه وشوه چې مالداران د هغو اړینو وسایلو او تجهیزاتو څخه برخمن شي چې د څارویو د روغتیا، تغذیې او اغېزمن مدیریت په برخه کې ورته اړتیا لري.
په دې پروګرام کې ټولټال ۱۸۰ مالدارانو ته د مالدارۍ د مدیریت بشپړې بستې ووېشل شوې. هره بسته په ۲۵ قلمه بېلابېلو او اړینو توکو مشتمله وه، چې د مالدارۍ د ساتنې، روغتیايي خدماتو، حفظ الصحې، تغذیې او د څارویو د اغېزمن مدیریت لپاره ترې ګټه اخیستل کېږي.
د بستو د وېش بهیر د پکتیکا ولایت د کرنې، اوبو لګولو او مالدارۍ ریاست او د نکه ولسوالی د کرنې او ترویج مدیریت په بشپړې همغږۍ او نظارت ترسره شو، ترڅو مرستې په شفاف او منظم ډول مستحقو مالدارانو ته ورسېږي.
د پروګرام پر مهال مسؤلینو د مالدارۍ سکتور پر اهمیت خبرې وکړې او څرګنده یې کړه، چې د مالدارانو ملاتړ نه یوازې د کورنیو د عایداتو په زیاتوالي کې مرسته کوي، بلکې د کلیوالي اقتصاد د پیاوړتیا او د خوراکي خوندیتوب په تأمین کې هم مهم رول لري.
مستفیدینو د دغو مرستو هرکلی وکړ او د اړیکو دفتر د کرنې، اوبو لګولو او مالدارۍ ریاست او د نکه ولسوالی د کرنې مسؤلینو څخه یې مننه وکړه، چې د مالدارۍ د پراختیا او د مالدارانو د ملاتړ لپاره یې دا ارزښتناک پروګرام عملي کړی دی. هغوی زیاته کړه، چې د دغو تجهیزاتو په وسیله به وکولای شي د خپلو څارویو ساتنه او پالنه په ښه او معیاري ډول ترسره کړي.
د یادونې وړ ده، چې د مالدارۍ د مدیریت د بستو دغه لړۍ د مالدارانو د ظرفیت لوړولو، د څارویو د روغتیا د ښه والي او د کلیوالو کورنیو د اقتصادي پیاوړتیا په موخه پلي کېږي او تمه ده، چې د دې ډول پروګرامونو په دوام سره به د مالدارۍ سکتور لا وده او پراختیا ومومي.