زابل کې د ۱۰۰ میلیونه افغانیو په پانګونې د کرنیز او سوداګریز کمپلکس رغنیزې چارې پرانیستل شوې
۲۶ غویی ۱۴۰۵ه.ش
۲۹ ذُو ٱلْقَعْدَةِ ۱۴۴۷ه.ق
د زابل ولایت د شاهجوی ولسوالی کې د خصوصي سکټور له لوري د ۱۰۰ میلیونه افغانیو په پانګونې د «سوداګریز، کرنیز او مالدارۍ» کمپلکس «ټولګه» رغنیزې چارې پرانیستل شوې.
دغه پروژه د کرنې، اوبولګولو او مالدارۍ وزیر مولوي عطاءالله عمري، د زابل والي مولوي شیرمحمد شریف او د یاد ولایت د یو شمېر سیمهییزو چارواکو په حضور کې پيل شوه.
مولوي عطاءالله عمري د دغې پروژې د پرانیستې په مراسمو کې په هېواد کې د بنسټیزو پانګونو پر ملاتړ ټینګار وکړ او ویې ویل، چې د کرنې وزارت له پانګهوالو سره همکارۍ ته چمتو دی او د پروژو د پلي کېدو لپاره هغوی ته ځمکې هم ورکوي. نوموړي زیاته کړه، چې اساسي موخه خلکو ته خدمت، اقتصادي ودې ته زمینه برابرول او د کارموندنې فرصتونه رامنځته کول دي.
همدارنګه د زابل والي مولوي شیرمحمد شریف د امیرالمؤمنین له لوري د ځمکو د اجارې قانون تصویب د پانګونې د هڅونې لپاره مهم ګام وباله او د هېواد له سوداګرو یې وغوښتل، چې په افغانستان کې پانګونه وکړي.
د سیمې اوسېدونکو هم د دغې پروژې د پیل هرکلی وکړ او د خلکو لپاره یې د ځمکو د اجارې د زمینې برابرولو او د پانګهوالو د هڅونې غوښتنه وکړه، ترڅو ځوانانو ته لا ډېر کاري فرصتونه رامنځته شي.
یاد کمپلکس د «آباد هېواد» سوداګریز او کرنیز شرکت له لوري د ۳۰۰ جریبه ځمکې پر مساحت جوړېږي، چې کرنیز او مالدارۍ فارمونه او سړې خونې به پکې شاملې وي.
د کرنې، اوبولګولو او مالدارۍ وزارت وایي، هڅه کوي چې د خصوصي سکټور په همکارۍ بنسټیزې پروژې پلې کړي او په هېواد کې د کارموندنې زمینه لا پراخه کړي.
