د ننګرهار وادي کرنیز شرکت درېیم فارم کې د ۱.۱ کیلومتره فرعي سړک د هموارکارۍ چارې بشپړې شوې

۲۱ غویی ۱۴۰۵ه‍.ش
۲۴ ذُو ٱلْقَعْدَةِ ۱۴۴۷ه‍.ق
د ننګرهار وادي کرنیز، امارتي شرکت اړوند د درېیم فارم لومړي بلاک په ۹۴مه نمره ځمکه کې د ۱.۱ کیلومتره په اوږدوالي او لس متره پلنوالي فرعي سړک د هموارکارۍ چارې بشپړې شوې، چې ورسره د سیمې اوسېدونکو، بڼوالو او کروندګرو ته د تګ راتګ اسانتیاوې برابرې شوې دي.
یاد سړک د ننګرهار وادي کرنیز، امارتي شرکت په تخنیکي همکارۍ او د حکیم الله صافي قراردادي شرکت په مالي لګښت رغول شوی، چې د سیمې د بنسټیزو اسانتیاوو د ښه کېدو په برخه کې مهم ګام بلل کېږي.
د حکیم الله صافي قراردادي شرکت مسوول حاجي حبیب الله صافي وویل، د سړک د هموارولو ترڅنګ یې په همدې نمره ځمکه کې ۱۲ جریبه نااباده او مخروبه ځمکه هم کرنې ته چمتو کړې، چې له کلونو راهیسې شاړه پرته وه. د هغه په وینا، ټاکل شوې ده په نږدې راتلونکي کې پر دغې ځمکې د مالټو نوی بڼ جوړ شي.
بل لور ته د درېیم فارم امر مولوي محمد ګل مطمئن وویل، یاد فرعي سړک د تېرو کلونو ناخوالو پر مهال سخت زیانمن شوی و، چې له امله یې د مالټو بڼ لرونکي او ځایي اوسېدونکي د تګ راتګ پر مهال له ګڼو ستونزو سره مخ وو.
هغه زیاته کړه، اوس د سړک د هموارکارۍ له بشپړېدو وروسته د خلکو تګ راتګ اسانه شوی او د بڼ لرونکو ستونزې هم تر ډېره حل شوې دي.
نوموړي د قراردادي شرکت له مسوولینو وغوښتل، چې د سړک د جغل اچونې چارې هم ژر تر ژره ترسره کړي، څو د دوړو او ګردونو مخه ونیول شي او د سیمې شته مالټې بڼونه له احتمالي زیانونو خوندي پاتې شي.
په همدې حال کې د سیمې اوسېدونکو هم د یاد اقدام هرکلی کړی او دا یې د سیمې د پرمختګ او اقتصادي ودې لپاره مهم ګام بللی دی. هغوی له نورو شرکتونو او پانګه‌والو هم غوښتنه کړې چې د عامه ګټو ورته پروژو پلي کولو ته لا ډېره پاملرنه وکړي.