د پکتیا په روحاني بابا ولسوالی کې د غوښینو چرګانو د فارمونو څارنه او ارزونه ترسره شوه
۲۱ غویی ۱۴۰۵ه.ش
۲۴ ذُو ٱلْقَعْدَةِ ۱۴۴۷ه.ق
د پکتیا ولایت د کرنې، اوبولګولو او مالدارۍ ریاست اړوند د مالدارۍ او حیواني روغتیا آمریت تخنیکي کارکوونکو له لوري د روحاني بابا ولسوالی په مربوطاتو کې د خصوصي سکتور اړوند د غوښینو چرګانو له یو شمېر فارمونو څخه لیدنه، څارنه او تخنیکي ارزونه ترسره شوه.
د یادې څارنې پر مهال د پکتیا دکرنې ریاست د مالدارۍ آمر قاري نورالله درویش، د ګټورو حشراتو اقتصادي مدیر شیراغا افضلي او د مالدارۍ عمومي مدیر عبدالبصیر کوچي هم حضور درلود او د فارمونو مسؤلینو او کارکوونکو ته یې د چاپېریال پاک ساتنې، د حفظ الصحې اصولو مراعت، د چرګانو د ناروغیو د مخنیوي، مناسبې تغذیې، معیاري روزنې او د فارمونو د اغېزمن مدیریت په اړه لازمې تخنیکي سپارښتنې او عملي لارښوونې وړاندې کړې.
همداراز یادو مسؤلینو ټینګار وکړ، هغه نوي فارمونه چې تازه جوړېږي، باید د فعالیت له پیل وړاندې د کرنې ریاست د مالدارۍ او حیواني روغتیا آمریت څخه رسمي اجازه نامه ترلاسه کړي، ترڅو چارې یې د ټاکلو اصولو او مقرراتو له مخې پرمخ ولاړې شي.
د یادونې وړ ده، چې دا مهال د پکتیا ولایت په کچه لسګونه د چرګانو فارمونه د کرنې ریاست سره ثبت او راجستر دي. سربېره پر دې، یوازې په روحاني بابا ولسوالۍ کې شپږ نوي فارمونه ثبت شوي او د فعالیت رسمي اجازه لیک ورته صادر شوي دي.
