د ننګرهار کوز کونړ کې لسګونو کورنیو ته د هګیو چرګانو وېش؛ د کورني اقتصاد پیاوړتیا لپاره مهم ګام
۱۰ غویی ۱۴۰۵ه.ش
۱۳ ذُو ٱلْقَعْدَةِ ۱۴۴۷ه.ق
د ننګرهار ولایت د کرنې، اوبو لګولو او مالدارۍ ریاست په هڅو او د ستاسو غږ مؤسسې) په همکارۍ، د کوز کونړ ولسوالی کې ۱۲۰ تنه راستنېدونکو هېوادوالو، معلولینو او کونډو مېرمنو ته د هګیو چرګان ووېشل شول.
د ننګرهار د کرنې، اوبو لګولو او مالدارۍ رییس مولوي عبدالستار محمد وویل، چې هرې مستحقې کورنۍ ته ۳۰ دانې چرګان ورکړل شوي، چې له ډلې یې ۲۷ د هګیو چرګان او ۳ چرګان شامل دي.
نوموړي زیاته کړه، د دې پروګرام اساسي موخه د مالدارۍ سکتور پیاوړتیا، د کورنیو اقتصادي ملاتړ او د خوړو خوندیتوب ته وده ورکول دي، څو کورنۍ وکولای شي له خپلو تولیداتو څخه دوامداره ګټه ترلاسه کړي.
د معلوماتو له مخې، له دې وړاندې هم یادو کورنیو ته د چرګانو د ساتنې اړوند لازم توکي لکه یوه دروازه، دوه جالۍ لرونکې کړکۍ، درې د اوبو لوښي، درې د دانې لوښي، دوه متره جالۍ او ۱۵۰ ګرامه د چرګانو دانه ورکړل شوې وه، څو د چرګانو روزنه په معیاري ډول ترسره شي.
د یادونې وړ ده، چې ستاسو غږ مؤسسې تر دې وړاندې هم د ننګرهار په بېلابېلو ولسوالیو کې د بې وزلو کورنیو د ملاتړ په موخه ورته پروګرامونه پلي کړي، چې د خلکو له لوري یې تود هرکلی شوی دی.
د کرنې وزارت له خوا د کرنې او مالدارۍ سکټور د پیاوړتیا او د کلیوالو کورنیو د اقتصادي وضعیت د ښه والي په موخه، په دې وروستیو کلونو کې په بېلابېلو ولایتونو کې د کوچنیو عایداتي پروژو پلي کېدل زیات شوي دي. د چرګانو د روزنې پروګرامونه د هغو اغېزناکو لارو څخه دي، چې هم د خوړو خوندیتوب تضمینوي او هم د کورنیو لپاره دوامداره عاید برابروي.
