روسیې ته د کرنې وزارت د پلاوي سفر او د تخنیکي همکاریو پر پراختیا یې ټینګار
۲۹ وری ۱۴۰۵ه.ش
۱ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزارت یو لوړپوړی پلاوی، چې مشري یې د کرنې او مالدارۍ مرستیال مولوي صدراعظم عثماني کوله، د روسیې فدراسیون ته د خپل رسمي سفر په ترڅ کې د هغه هېواد د کرنې وزارت له اړوندو تخنیکي او اداري بنسټونو سره ګډه ناسته ترسره کړه. په دې ناسته کې د تېرو څو ورځو د لیدنو او تخنیکي ارزونو پایلې وارزول شوې او د دواړو هېوادونو ترمنځ د همکاریو مهم محورونه تر بحث او تحلیل لاندې ونیول شول.
په دې لیدنه کې دواړو لورو د کرنیزو محصولاتو د صادراتو او وارداتو تنظیم، د کیفیت د کنټرول او معیاري کولو سیسټمونو رامنځته کول او پیاوړي کول، د نباتي او حیواني قرنطین سیسټمونو لوړول او همدارنګه د تخنیکي زدهکړو او ظرفیتلوړونې پروګرامونو پراختیا په څېر مسلو باندې تمرکز او خبرې اترې وکړې.
همدارنګه، د روسیې د کرنیزې څار ادارې له مسؤلینو او د هغه هېواد د کرنې وزارت له چارواکو سره په یادو برخو کې د عملي همکاریو پر پراختیا ټینګار وشو.
د دې ناستې په پایله کې هوکړه وشوه، چې د دواړو هېوادونو ترمنځ تخنیکي همکارۍ لا پراخې شي، ګډې پروژې پیل شي او شوې هوکړې د دواړو هېوادونو د بهرنیو چارو وزارتونو له لارې په رسمي ډول تعقیب شي.
