د کرنې وزارت پلاوي په مسکو کې له افغان سوداګرو سره د پانګونې د پراختیا په موخه وکتل
۲۹ وری ۱۴۰۵ه.ش
۱ ذُو ٱلْقَعْدَةِ ۱۴۴۷ه.ق
د افغانستان اسلامي امارت د کرنې، اوبو لګولو او مالدارۍ وزارت یو پلاوی، چې مشري یې د کرنې او مالدارۍ مرستیال مولوي صدراعظم عثماني کوله، د مسکو ښار کې د افغانستان په سفارت کې له یو شمېر روسیه مېشتو افغان سوداګرو سره وکتل او خبرې یې ورسره وکړې.
په دې ناسته کې د هېواد اقتصادي وضعیت، د کرنې او مالدارۍ په برخو کې پرمختګونه او همدارنګه د پانګونې فرصتونه تر بحث لاندې ونیول شول. د کرنې او مالدارۍ مرستیال په دې برخو کې ترسره شوې لاسته راوړنې او اصلاحات تشریح کړل او د پانګونې لپاره د مناسبو زمینو پر شتون یې ټینګار وکړ.
افغان سوداګرو د یادو معلوماتو هرکلی وکړ او د سړو خونو په برخه کې د لا زیاتو اسانتیاوو د برابرولو غوښتنه وکړه، څو د تازه مېوو او سبو د ساتنې، پروسس او صادراتو لپاره غوره زمینه برابره شي.
د کرنې وزارت چارواکو د دغو غوښتنو په ځواب کې د همکارۍ او د سړو خونو د جوړولو او پراختیا په برخه کې د اسانتیاوو د رامنځته کولو چمتووالی څرګند کړ او د پانګوالو پر ملاتړ یې ټینګار وکړ.
همدارنګه په دې ناسته کې ټینګار وشو چې د سړو خونو پراختیا کولای شي د کرنیزو محصولاتو د ضایعاتو په کمولو، د تولیداتو د کیفیت په ساتنه، د صادراتو په زیاتوالي او د کاري فرصتونو په رامنځته کولو کې مهم رول ولوبوي.
په پای کې، په مسکو کې د افغانستان سفیر هم له افغان سوداګرو سره د همکاریو پر دوام ټینګار وکړ او ډاډ یې ورکړ چې د پانګونې د پیاوړتیا او د هېواد د اقتصادي ودې لپاره به لازمې همغږۍ دوام ولري.
