د کرنې وزارت او همکارو بنسټونو ترمنځ د کرنیزو او مالدارۍ محصولاتو نندارتون د جوړېدو په موخه د همغږۍ غونډه
۲۰ وری ۱۴۰۵ه.ش
۲۲ شَوّالُ المُکَرَّم ۱۴۴۷ه.ق
د کرنې، اوبو لګولو او مالدارۍ وزارت، د افغانستان د کرنیزو او مالدارۍ محصولاتو خونې او د همکارو مؤسسو او دفترونو د استازو ترمنځ د بزګر مېلې او د کرنیزو او مالدارۍ محصولاتو د ۳۴م نندارتون د ښه تنظیم په موخه د همغږۍ غونډه د یاد وزارت د پالیسۍ او پلان په تالار کې ترسره شوه.
د غونډې په پیل کې، د پلان او پالیسۍ رییس سید خالد صاحبزاده، د خصوصي سکتور د پراختیا ریاست سلاکار عزیزالرحمن رحماني او د کرنې او مالدارۍ خونې اجرائیوي رییس وسیم صافي د کرنیزو او مالدارۍ محصولاتو نندارتون د ښه تنظیم لپاره پر همغږۍ، انسجام او ګډې همکارۍ خبرې وکړې.
همداراز، ګډونوالو د نوښتونو، بازارموندنې، د بزګرانو د ملاتړ، د تجربو د شریکولو او ګډو فعالیتونو په اړه بحث او نظرونه تبادله کړل، څو د نندارتون کیفیت او اغېزمنتیا لا لوړه شي.
ټاکل شوې ده، چې د کرنیزو او مالدارۍ محصولاتو ۳۴م نندارتون د روان کال د غویي میاشتې له ۲مې تر ۵مې نېټې پورې د کابل په بادامباغ کې د کرنې، اوبو لګولو او مالدارۍ وزارت له لوري ترسره شي.
