د کرنې او مالدارۍ مرستیال د عزیزی ګروپ له چارواکو سره وکتل
۲۵ کب ۱۴۰۴ه.ش
۲۷ رَمَضانُ المُبارَک ۱۴۴۷ه.ق
د کرنې وزارت د کرنې او مالدارۍ مرستیال مولوي صدراعظم عثماني د کرنې، اوبو لګولو او مالدارۍ وزارت په مقر کې د «عزیزی ګروپ» له اجرائیوي رییس او یو شمېر چارواکو سره وکتل.
په دې لیدنه کې مولوي صدراعظم عثماني د ټولګټې پانګونې پر اړتیا ټینګار وکړ او ویې ویل، چې اساسي موخه په هېواد کې د صنعت، سوداګرۍ او پانګونې وده ده، څو د عامو خلکو ګټې هم خوندي شي.
د عزیزی ګروپ اجرائیوي رییس جاوید لودین د امارتي ادارو له همکاریو څخه خوښي څرګنده کړه او د برېښنا د تولید د پروژو د پلي کېدو او د ځمکو د برابرولو په برخه کې یې د لا زیاتو همکاریو غوښتنه وکړه.
عزیزی ګروپ شرکت، چې مشري یې میرویس عزیزی کوي، دا مهال د کابل، پروان، غزني، بغلان او تخار ولایتونو کې د ۸۴۵ مېګاواټه ظرفیت په لرلو سره د برېښنا د پنځو بټیو د جوړولو پر کار بوخت دی، چې د دغو پروژو لپاره د ځمکو لېږد او انتقال د کرنې، اوبو لګولو او مالدارۍ وزارت پر غاړه دی.
