د پاکستان قاچاقي څارویو په وړاندې د بریالي هڅو په دوام؛ دا ځل د یوشمېر مېښو د قاچاق مخه نیول شوې
۱۸ کب ۱۴۰۴ه.ش
۲۰ رَمَضانُ المُبارَک ۱۴۴۷ه.ق
د کندهار د کرنې، اوبو لګولو او مالدارۍ ریاست وایي، چې یو ځل بیا په سپین بولدک ولسوالی کې د ویښو او بیداره مجاهدینو له لوري د یوشمېر مېښو د قاچاق مخه نیول شوې ده.
د کندهار دکرنې ریاست چارواکي وایي، یادې میښې د سپین بولدک ولسوالۍ د ډیورنډ فرضي کرښې له لارې په قاچاقي ډول هېواد ته رالیږدول کېدې، چې د امنیتي ځواکونو د چټک اقدام په پایله کې یې مخه ونیول شوه. د هغوی په وینا د یاد قاچاق په تړاو یو تن هم نیول شوی دی، چې د محکمې له پرېکړې وروسته به ورسره قانوني چلند وشي.
د یادو څارویو د قاچاق مخه په داسي حال کې نیول کیږي چې، په دې وروستيو کې د کندهار ویښو او بیداره مجاهدینو پر ډیورنډ فرضي کرښه څو ځلي د څارویو د قاچاق هڅه شنډه کړې ده او هیڅ چاته یې اجازه نه ده ورکړي، چې څاروي کندهار ته را انتقال کړي، چې د همدې هڅو په دوام یې تېرو درې ورځو کې هم د یوشمېر نورو غواوو مېښو د قاچاق مخه نیولي وه.
