کندهار ته له پاکستان څخه د قاچاقي غواوو د انتقال مخه ونیول شوه
۱۲ کب ۱۴۰۴ه.ش
۱۴ رَمَضانُ المُبارَک ۱۴۴۷ه.ق
د کندهار د کرنې، اوبو لګولو او مالدارۍ ریاست چارواکي وایي، چې د سپین بولدک ولسوالی امنیتي ځواکونو له پاکستان څخه کندهار ته د ۲۵ سرې غواوو د قاچاق مخه نیولې ده.
د مسؤلینو په وینا، یادې غواوې د یو شمېر کسانو له لوري د سپین بولدک ولسوالی د ډیورنډ فرضي کرښې له لارې په غیرقانوني ډول هېواد ته رادننه کېدې، چې د امنیتي ځواکونو د چټک اقدام په پایله کې ونیول شوې. د قاچاق په تړاو یې درې تنه هم نیول شوي، چې د محکمې له پرېکړې وروسته به ورسره قانوني چلند وشي.
د یادونې وړ ده، چې په دې وروستیو کې د ډیورنډ فرضي کرښې په اوږدو کې د امنیتي مسؤلینو هڅې زیاتې شوي دي او ټینګار کېږي، چې هېچا ته به اجازه ورنه کړل شي، ترڅو څاروي په قاچاقي ډول هېواد ته دننه یا بهر ولېږدوي. د همدې هڅو په دوام، دوه ورځې وړاندې هم د ۱۶ سرې غواوو د قاچاق مخه نیول شوې وه.
