د کرنې وزیر په پروان کې له کډوالۍ راستنېدونکو کورنیو ته د غنمو او نغدي مرستو وېش لړۍ پرانیسته

د افغانستان اسلامي امارت د کرنې، اوبو لګولو او مالدارۍ وزیر مولوي عطاءالله عمري په پروان ولایت کې له کډوالۍ راستنېدونکو کورنیو ته د غنمو او نغدي مرستو د وېش لړۍ پرانیسته.
دا پروګرام د عاليقدر امیرالمؤمنین حفظه‌الله تعالی د لارښوونې پر بنسټ او د پروان والي، د امارتي ادارو د رییسانو او سیمه‌ییزو چارواکو په حضور کې پیل شو. د دې پروګرام موخه هغو کورنیو ته بېړنۍ مرسته رسول دي، چې تازه له ګاونډیو هېوادونو څخه خپل هېواد ته راستنې شوې دي.
د دې پروګرام له مخې، هرې کورنۍ ته ټاکلې اندازه غنم او نغدي مرسته په پام کې نیول شوې، څو وکولای شي د خپلو بېړنیو خوراکي او معیشتي اړتیاوو یوه برخه پوره کړي. دغه اقدام د کرنې، اوبو لګولو او مالدارۍ وزارت د هغو هڅو برخه ده، چې د خوراکي خوندیتوب د پیاوړتیا او په ستونزمنو اقتصادي شرایطو کې د راستنېدونکو کورنیو د زیان‌مننې د کمولو لپاره ترسره کېږي.
مولوي عطاءالله عمري د پرانیستې په مراسمو کې له کډوالۍ د راستنېدونکو کورنیو د ملاتړ پر اهمیت ټینګار وکړ او ویې ویل، د اساسي خوراکي توکو برابرول او نغدي مرستې د کورنیو د معیشتي ثبات او د تغذیوي ستونزو د مخنیوي په برخه کې مهم رول لري. نوموړي زیاته کړه، چې دکرنې وزارت هڅه کوي له نورو اړوندو ادارو سره په همغږۍ دا ډول پروګرامونه په دوامداره توګه پرمخ یوسي.
په همدې حال کې د پروان والي هم له کډوالۍ راستنو شویو کورنیو سره د مرستو پر دوام ټینګار وکړ او ویې ویل چې د دې ولایت امارتي ادارې به د کرنې وزارت سره په همغږۍ د اړمنو او راستنېدونکو کورنیو د ملاتړ لپاره خپلې هڅې لا پراخې کړي.
راستنېدونکو کورنیو د دغو مرستو له ترلاسه کولو خوښي څرګنده کړه او ویې ویل، چې دا مرستې کولای شي هېواد ته د بېرته ستنېدو په لومړیو ورځو کې د دوی د لومړنیو اړتیاوو یوه مهمه برخه پوره کړي.
دا پروګرام د افغانستان اسلامي امارت له لوري په بېلابېلو ولایتونو کې  له کډوالۍ د راستنېدونکو کورنیو د وضعیت د ښه والي او د هغوی د خوراکي خوندیتوب د تأمین لپاره د ترسره کېدونکو اقداماتو یوه برخه ګڼل کېږي.