د خاص کونړ ولسوالی کې د اوبو د مدیریت او نیالګیو کېنولو پروژو څخه د کرنې وزارت د پلاوي لیدنه
۱۴ سلواغه ۱۴۰۴ه.ش
۱۵ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزارت د پلان او پروګرامونو د همغږۍ د لوی رییس او د نظارت او ارزونې د رییس په مشرۍ، له خپل تخنیکي ټیم سره یو پلاوي د خاص کونړ ولسوالی د آهنګرانو او حکیمآباد کلیو کې د چکډېمونو د جوړولو، د کوچنیو او لویو د څښاک اوبو زېرمو، د تراسونو د کیندنې او د نیالګیو کېنولو د پروژو د تطبیق بهیر څخه لیدنه وکړه.
په دې لیدنه کې پلاوي د پروژې له چارواکو، مستفیدینو او کارګرو سره خبرې وکړې او د پروژو د تطبیق له سیمو یې له نږدې کتنه ترسره کړه. دغه پروژه د انګلستان هېواد په مالي ملاتړ او د ماشومانو د ملاتړ ادارې له لارې د چکډېمونو د جوړولو، د حوضونو او د اوبو د زېرمو د اعمار، د شاوخوا درې زره او ۶۶۰ ترانچونو د کیندنې او د لمریزې انرژۍ په وسیله د اوبو لګولو د سیستم د رامنځته کولو په برخو کې پلې کېږي. اړینې اوبه د چکډېمونو او د کونړ د سیند له کانال څخه پخې شوې حوضونو ته انتقالېږي او له هغه ځایه د لمریز پمپونو په وسیله د پایپونو له لارې د نیالګیو د خړوبولو لپاره کارول کېږي.
د مسوولینو د معلوماتو له مخې، د یادې پروژې چارې په دواړو ساحو کې وروستیو پړاوونو ته رسېدلې او ډېر ژر به د چهارمغز، بادام، خسک توت، بیره او غولاسکي نیالګي کېنول شي.
د دې پروژې په تطبیق سره د سیمې اوسېدونکو ته د لنډمهالي کار زمینه برابره شوې او کارګران په نوبتي ډول په ودانیزو فعالیتونو او د سیمو د چمتو کولو په چارو بوخت دي. د دغو پروګرامونو پلي کېدل به د ځمکنیو او سطحي اوبو د پیاوړتیا، د سیمې د زرغونتیا، د هوا د ککړتیا د کمښت او د مېوهلرونکو نیالګیو د تولید له لارې د خلکو د اقتصادي وضعیت د ښه کېدو په برخه کې مهم رول ولوبوي.
