د غزني دکرنې رییس د خصوصي سکټور د پراختیا له چارواکو سره وکتل
۷ سلواغه ۱۴۰۴ه.ش
۸ شَعبان المُعَظّم ۱۴۴۷ه.ق
د غزني ولايت د کرنې، اوبو لګولو او مالدارۍ رییس د دې رياست د یوشمېر نورو چارواکو په شتون کې د خصوصي سکټور د پراختیا له چارواکو سره په يوه کاري ناسته کې د کرنيزو او حيواني محصولاتو د توليدي فابريکو، کرنيزو او مالدارۍ بنسټونو د ليدنې او ارزونې په اړه خبرې او سلا مشورې وکړې.
په دې ناسته کې د فابريکو د فعاليتونو وضعيت، د توليد ظرفيتونه، د کرنې او مالدارۍ په وده کې د خصوصي سکټور رول او د دولتي ادارو او خصوصي بنسټونو ترمنځ همغږي وڅېړل شوه. همدارنګه، په سکټوري برخه کې شته ستونزې، لکه د توليد، بازارموندنې، د محصولاتو د پروسس او تخنيکي اړتياوو ستونزې تر بحث لاندې ونيول شوې.
د ناستې په پای کې د همکاريو پر پياوړتيا، د خصوصي سکټور پر ملاتړ او د غزني ولايت د کرنيزو او حيواني توليداتو د ښهوالي او پرمختګ لپاره د عملي حل لارو پر موندلو ټينګار وشو.
