د هلمند سنګین ولسوالۍ کې د کرنیزو ځمکو د بیا احیا لپاره د زهکشۍ کانال د پاککارۍ پروژې پرانیسته
۴ سلواغه ۱۴۰۴ه.ش
۵ شَعبان المُعَظّم ۱۴۴۷ه.ق
د هلمند ولایت د سنګین په ولسوالی کې د کرنیزو ځمکو د بیا احیا په موخه د کانال او زهکشۍ «اوبوایستلو» د پاککارۍ پروژه د کرنې، اوبو لګولو او مالدارۍ وزارت د کرنیزو ځمکو د اصلاح او زهکشۍ ریاست له لوري، د کرنې وزارت د پراختیایي بودجې څخه د څه باندې دوه میلیونه او ۴۳ زره افغانیو په لګښت پرانیستل شوه.
یاده پروژه د هلمند ولایت د سنګین ولسوالۍ د میانوردي په کلي کې، د کرنې، اوبو لګولو او مالدارۍ وزارت د استازي، د هلمند ولایت د کرنې، اوبو لګولو او مالدارۍ رییس، د سنګین ولسوالی د استازي او یو شمېر سیمهییزو مشرانو او مخورو په حضور کې پرانیستل شوه او عملي کار یې پیل شو.
دغه پروژه د کرنیزو ځمکو د بیا احیا او اصلاح او همدارنګه د میانوردي کلي په کرنیزو سیمو کې د اوبو د مدیریت د ښهوالي په موخه، د کرنې، اوبو لګولو او مالدارۍ وزارت د پراختیایي بودجې څخه د دوه میلیونه او ۴۳ زره او ۷۸۵ افغانیو په لګښت او د همت دراني ودانیز شرکت سره د قرارداد له مخې پلي کېږي.
