د رانیول شوو غنمو د زېرمو د څارنې په موخه ځانګړی پلاوی هلمند ته سفر وکړ
۲۳ مرغومې ۱۴۰۴ه.ش
۲۳ رَجَب المُرَجَّب ۱۴۴۷ه.ق
د عاليقدر امیرالمؤمنین له لوري پلاوی، چې د تېر کال په جریان کې د رانیول شوو او په منظم ډول د زېرمه شوو غنمو د څارنې، ارزونې او کره کتنې په موخه ګمارل شوی، هلمند ولایت ته سفر وکړ او د دغه ولایت د کرنې، اوبولګولو او مالدارۍ ریاست له رئیس سره یې د خپل کاري سفر موخې، پلانونه او د نظارت تګلاره شریکه کړه.
په دې ناسته کې د روان مالي کال په ترڅ کې د غنمو د ساتنې، حفظ او مراقبت په برخه کې د ترسره شوو کړنو، د زېرمو د وضعیت، د ساتنې د معیارونو، امنیتي تدابیرو، تخنیکي تجهیزاتو او د اړوندو کارکوونکو د مسؤلیتونو په اړه هر اړخیز او مفصل بحث وشو. همدارنګه د احتمالي ستونزو، ننګونو او د هغوی د حل لارو په اړه هم د نظرونو تبادله وشوه.
د هلمند ولایت د کرنې، اوبولګولو او مالدارۍ رییس مولوي شیراحمد رفیع، راغلي پلاوي ته ښه راغلاست ووایه او ټینګار یې وکړ، چې د هلمند د کرنې ریاست د اسلامي امارت د مشرتابه د لارښوونو مطابق د غنمو د ساتنې او مراقبت په برخه کې خپل مسؤلیت په بشپړ ډول ادا کړی او په راتلونکي کې هم د هر ډول همکارۍ لپاره بشپړ چمتووالی لري.
د نوموړي په لارښوونه، د دواړو لورو له استازو څخه یو ګډ تخنیکي پلاوی وټاکل شو، چې مشري یې انجینر امانالله تسکین کوله. یاد پلاوی ته دنده وسپارل شوه، تر څو د غنمو ټولې زېرمې له نږدې، د دقیقو او تخنیکي معیارونو سره سم وڅېړي او د ترسره شوو کارونو عملي ارزونه وکړي.
ګډ پلاوی د هلمند د کرنې، اوبولګولو او مالدارۍ ریاست لهخوا د غنمو د حفظ او مراقبت لپاره ترسره شوي اقدامات، د زېرمو وضعیت، د ساتنې طریقې او موجود نظم له نږدې وکتل. د ارزونې له بشپړېدو وروسته، راغلي پلاوي د هلمند د کرنې ریاست هڅې، منظم کار او شفاف مدیریت وستایه او د هغوی له اجراآتو څخه یې خپل رضایت څرګند کړ.
