کندز کې د یوریا سپرې او د بوټو آفتونو او ناروغیو پر ضد د مبارزې کمپاینونه په بریالیتوب سره پای ته ورسېدل
۴ مرغومې ۱۴۰۴هـ.ش
۴ رَجَب المُرَجَّب ۱۴۴۷هـ.ق
د کندز ولایت د کرنې، اوبو لګولو او مالدارۍ ریاست د بوټو ساتنې مدیریت کارکوونکو له خوا د یوریا سپرې او د نباتي آفتونو او ناروغیو پر ضد د مبارزې کمپاینونه، له پراخ او منظم تطبیق وروسته، د دې ولایت کې په درېیو ولسوالیو کې په بریالیتوب سره پای ته ورسېدل.
یاد کمپاینونه د بڼونو د ساتنې، د نباتي آفتونو له امله د زیانونو د کمولو، د بڼوالۍ د حاصلاتو د زیاتوالي او د بزګرانو او بڼوالو د معیشت د ملاتړ په موخه پیل شوي وو. دغه پروګرام په ۲۰ کلیو کې عملي شو، چې په ترڅ کې یې ټولټال ۵۸ زره او ۹۵۳ مېوه لرونکې ونې د یوریا سپرې او د آفتونو او نباتي ناروغیو پر ضد د اغېزمنو کنټرولي اقداماتو تر پوښښ لاندې راوستل شوې.
همدارنګه، د دې پروګرام د تطبیق پر مهال د کندز د کرنې ریاست تخنیکي کارکوونکو ۱۶۱ تنه بزګرانو او بڼوالو ته د نباتي ناروغیو د پېژندنې، د مخنیوي لارو چارو، د کیمیاوي درملو د سم استعمال وخت او طریقې، او د آفتونو پر ضد د اصولي مبارزې په اړه لازمې روزنې او پوهاوی ورکړی دی.
د یادونې وړ ده، چې د راتلونکي کاري پلان له مخې، د کندز ولایت د کرنې، اوبو لګولو او مالدارۍ ریاست به د سلواغې او کب په میاشتو کې د ژمنیو تېلو او لایم سلفر د جوړولو، د استعمال طریقې او د هغو د اغېزو په اړه نورې روزنیزې برنامې هم په بېلابېلو سیمو کې تطبیق کړي. په دغو برنامو کې به بزګران او بڼوال له تخنیکي لارښوونو برخمن شي او د ژمي په موسم کې د بڼونو د ساتنې لپاره به عملي مشورې ترلاسه کړي.
