پکتیکا کې د کار په بدل کې نغدي مرستې؛ په ګومل او جانیخېل کې ۱۲۱۰ کسانو ته نږدې ۹ میلیونه افغانۍ ووېشل شوې
۱ مرغومې ۱۴۰۴ه.ش
۱ رَجَب المُرَجَّب ۱۴۴۷ه.ق
د پکتیکا ولایت په ګومل او جانیخېل ولسوالیو کې د خوړو نړۍوال پروګرام «ډبلیو.ایف.پي» په مالي ملاتړ او د هیلتو مؤسسې لهخوا، د کار په بدل کې د نغدو مرستو پروګرام پلي شو، چې له مخې یې ۱۲۱۰ تنو مستقیمو ګټهاخیستونکو ته د یوې میاشتې د کار په بدل کې نغدي پیسې ووېشل شوې.
یاد پروګرام د بېلابېلو عامهالمنفعه پروژو له لارې عملي شوی، چې پکې د اوبولګولو کانالونو جوړول او بیارغونه، د اوبو د ذخیرې حوضونه، ترینچونه (خندقونه)، د سړکونو بیارغونه او د ګبیوني دیوالونو جوړول شامل دي. د دغو پروژو په ترڅ کې سلګونو کسانو ته د لنډمهالي کار زمینه برابره شوې ده.
د مسوولینو په وینا، هر ګټهاخیستونکي ته د میاشتني کار په بدل کې ۶۴۰۰ افغانۍ ورکړل شوې دي. د دې پروژو له لارې، له یوې خوا د خلکو د عاید کچه لوړېږي او د خوړو خوندیتوب ته زمینه برابریږي، او له بلې خوا د سیمې بنسټیزې زېربناوې پیاوړې کېږي.
د معلوماتو له مخې، په ګومل او جانیخېل ولسوالیو کې د یاد پروګرام له لارې شاوخوا ۹ میلیونه افغانۍ مستحقو کسانو ته توزیع شوې دي، چې د خلکو د اقتصادي ستونزو په کمولو او د ټولنې د بنسټیزو اړتیاوو په پوره کولو کې مهم رول لري.
