د ننګرهار چپرهار ولسوالی کې ٣٥٠ بزګرانو ته د غنمو ضایعاتو مخنیوي په موخه کندوان ورکړل شول

د ننګرهار د کرنې، اوبو لګولو او مالدارۍ ریاست په هڅو د سره صلیب نړۍوالې کمېټې په مرسته چپرهار ولسوالی کې ٣٥٠ بزګرانو ته د غنمو ضایعاتو او حشراتو څخه د مخنیوي په موخه کندوان ورکړل شول.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د سره صلیب نړۍوالې کمېټي له لورې د چپرهار ولسوالی کې بزګرانو ته کندوان  د خورکي غنمو د ساتلو په پار وېشل شوي دي.
ښاغلي محسن وویل، چې هر بزګر ته دوه کندوان ورکړل شو چې د ٥٠٠ کیلو غنمو د ساتلو وړتیا لري. نوموړي زیاته کړه، که چیرته محصول په ښه ډول ونه ساتل شي نو ٢٠ سلنه د خپل تولیداتو ضایعات به ولرو.
د چپرهار ولسوالی مرستیال ولسوال مولوي عبدالقیوم ثاقب وویل، چې چپرهار یو له هغو ولسوالیو څخه دی، چې د طبیعي پیښو له امله ډېر زیانمن شوي او داسی مرستې به د دې غریب ولس لپاره ګټور تمام شي. نوموړې د ننګرهار د کرنې رییس مولوی محمد ولي محسن او مؤسسې له استازو څخه د لا نورو مرستو غوښتنه وکړه.
باید وویل شي، چې څو ورځې وړاندې یادو بزګرانو ته د غنمو ساتلو، زېرمه کولو او ضایعاتو مخنیوي په موخه د کرنې ریاست متخصصینو له لورې څلور ورځنۍ روزنه هم ورکړل شوې وه.