د کندهار دکرنې ریاست؛ د خاکریز باغکۍ ګنج په اجاره ورکړل شو

۱۰ لیندۍ ۱۴۰۴ هـ.ش
۱۰ جُمَادَى الثاني ۱۴۴۷ هـ.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د اجارې او پانګونې مدیریت په تخنیکي همکارۍ د خاکریز ولسوالی د باغکۍ ګنج د یو کال لپاره په اجاره ورکړل شو.
د کندهار دکرنې ریاست د اجارې عمومي مدیر مولوی عبدالحی خالد وایي، یاد ګنج د ازادې داوطلبۍ له لارې مستحق ګټونکي ته سپارل شوي او ورسره د ۳۰ کلونو اجارې هوکړه لیک هم شوی دی. د دې هوکړه لیک له مخې به هر کال ټاکل شوې اندازه اجاره، پرته له داوطلبۍ، د ا.ا.ا ملي بودیجې ته ورکول کېږي.
خالد زیاتوي؛ چې ګټونکی پلان لري په راتلونکو کلونو کې یاد ګنج معیاري کړي، د څارویو د ښه معاینې، درملني او اړوندو برخو لپاره اسانتیاوې رامنځته کړي، او موجودې نیمګړتیاوې پوره کړي، ترڅو مالداران په خپله سیمه کې له مناسب خدماتو برخمن شي.
د یادونې وړ ده، چې د کندهار د کرنې ریاست هڅه کوي، چې په کندهار کې ټولې امارتي ځمکې د شفافو، عادلانه او قانوني میکانیزمونو له مخې په اجاره ورکړي، ترڅو د دې ملي شتمنیو څخه مؤثره، اقتصادي او قانوني ګټه پورته شي. په همدې لړ کې وړاندې میلکو تولیدي کمپنۍ ته هم د ارغنداب ولسوالۍ سرکاري بڼ ته څېرمه سیمه کې ۱۰.۵ جریبه ځمکه د ۳۰ کلونو لپاره په اجاره ورکړل شوې وه.