د کندز او بغلان په ولایتونو کې د اوبو ایستلو او کرنیزو ځمکو د اصلاح د دوو پروژو پرانیسته

۲۸ لړم ۱۴۰۴ هـ.ش

۲۸ جُمَادَى الأول ۱۴۴۷ هـ.ق
د کرنې، اوبو لګولو او مالدارۍ وزارت د اوبو ایستلو او کرنیزو ځمکو د اصلاح ریاست چارواکي وایي، چې په کندز او بغلان ولایتونو کې دوه مهمې پروژې بشپړې او پرانیستل شوې دي.
لومړۍ پروژه د کندز ولایت د امام صاحب ولسوالی د الف بیردي په کلي کې په دوه میلیونه او ۶۳۰ او ۹۰۰ افغانیو لګښت پلي شوې ده. دغه پروژه د یو لړ رسمي مراسمو په ترڅ کې د اوبو ایستلو او کرنیزو ځمکو د اصلاح رییس مولوي ګلاب‌الدین ذبیح‌الله او د سیمې د مشرانو په حضور کې پرانیستل شوه.
دوهمه پروژه په بغلان ولایت کې د مرکزي بغلان ولسوالی اړونده د جان شفیع خیل، انارخیل او کهنه قلعه په کلیو کې په دوه میلیونه او ۸۷۵ زره  افغانیو لګښت بشپړه او ګټې اخیستنې ته وسپارل شوه. د دې پروژې د پرانیستې مراسم هم د یاد ریاست د رییس او سیمه ییزو مشرانو په ګډون ترسره شول.
د کرنې، اوبو لګولو او مالدارۍ وزارت د زهکشۍ او کرنیزو ځمکو د اصلاح ریاست چارواکي ټینګار وکړ چې دغه پروژې به د کرنیزو ځمکو د حاصل‌خېزۍ په لوړولو، د تولیداتو په زیاتوالي او د اوبو د سرچینو په اغېزمن مدیریت کې مهم رول ولوبوي.