د کرنې وزیر په کابل کې د هند د سفارت له شارژدافیر سره وکتل

۱۷ لړم ۱۴۰۴ هـ.ش
۱۷ جُمَادَى الأول ۱۴۴۷ هـ.ق
 د افغانستان اسلامي امارت د کرنې، اوبولګولو او مالدارۍ وزیر مولوی عطاءالله عمري، د خپل کار په دفتر کې په کابل کې د هندوستان د سفارت له شارژدافیر سره وکتل او د همکاریو په اړه یې خبرې وکړې.
په دې کتنه کې د کرنې وزارت د کرنې او مالدارۍ مرستیال مولوي صدراعظم عثماني، د وزارت یو شمېر رییسان او سلاکاران هم حاضر وو. دواړو لورو د افغانستان او هندوستان ترمنځ د ګډو همکاریو د پراختیا په اړه، په ځانګړي ډول د کرنې، اوبولګولو، مالدارۍ، د کرنیزو محصولاتو د صادراتو او د میکانیزه کرنیزو وسایلو د وارداتو په برخو کې بحث او نظرونه تبادله کړل. همدارنګه، د دواړو هېوادونو د اتباعو ترمنځ د سوداګریزو راکړو ورکړو د پیل او د کرنیزو بنسټیزو پروژو د پلي کېدو پر اهمیت ټینګار وشو.
مولوی عطاءالله عمري په خپلو خبرو کې وویل، افغانستان د څلوېښت کلونو جګړو تر څنګ د اقلیمي بدلونونو له اغېزو هم سخت متضرر شوی، چې وچکالۍ او کرنیزې آفتونه یې د هېواد د تولیداتو په کیفیت او کمیت دواړو ناوړه اغېز کړی دی. هغه زیاته کړه، چې اړینه ده د هغو نباتي ډولونو د روزنې او اصلاح په برخه کې علمي څېړنې وشي، چې د اقلیمي بدلونونو پر وړاندې مقاومت ولري.
د هند د سفارت شارژدافیر په ځواب کې ډاډ ورکړ، چې هېواد یې د خپلو امکاناتو په نظر کې نیولو سره پر یوې طرحې کار کوي، چې له مخې به په افغانستان کې د «افغان–هندو» په نوم یو څېړنیز مرکز جوړ شي، او د نوو پروژو د پلي کېدو لپاره به هڅې وشي. هغه دا هم وویل، چې د کرنې وزارت د متخصصینو د ظرفیت د لوړولو په موخه به د حضوري او انلاین روزنیزو پروګرامونو زمینه برابره شي.
دکرنې وزیر د هند له خوا د لابراتوارونو په تجهیز، د چکډېمونو په جوړولو او د مالدارۍ او حیواني روغتیا د کیفیت د کنټرول د لابراتوارونو په پیاوړتیا کې د همکارۍ غوښتنه وکړه. نوموړي همدارنګه له هند وغوښتل، چې د هغو افغان سوداګرو لپاره د ویزو د ترلاسه کولو په برخه کې اسانتیاوې رامنځته کړي، چې د افغانستان کرنیز او مالداري محصولات هند ته صادروي.
په پای کې، د هند شارژدافیر ډاډ ورکړ، چې یاد موضوعات به د ډیپلوماټیکو لارو له مخې تعقیب او په نږدې راتلونکي کې به عملي شي.