بلخ کې پر ۱۰۰ بزګرانو د شولو کرلو په پار مرسته ووېشل شوه

۱۳لړم ۱۴۰۴ هـ.ش
۱۳ جُمَادَى الأول ۱۴۴۷ هـ.ق
د بلخ د کرنې، اوبولګولو او مالدارۍ ریاست د هڅو او د کرنې وزارت د پراختیايي بودیجې په مرسته، د دې ولایت ۱۰۰ تنو بزګرانو ته د شولو د کرلو لپاره کیمیاوي سره، کرنیز وسایل او نغدي مرسته ووېشل شوه.
د بلخ د کرنې ریاست د معلوماتو له مخې، د دې برنامې موخه د شولو د حاصلاتو لوړول او بزګرانو ته د لا ښه تولید زمینه برابرول دي.
د برنامې له مخې، هر بزګر ته ۲۱ کیلوګرامه سپینه کیمیاوي سره، ۱۴ کیلوګرامه توره سره، د هرزه‌ګیاوو د مخنیوي لپاره یو عدد «پوش ویډر» او د ځمکې د چمتووالي لپاره نغدي مرسته ورکړل شوې ده.
یاد ریاست وايي، دا ډول مرستې د بزګرانو د هڅونې او د هېواد د کرنیز تولید د پیاوړتیا په موخه دوام لري.