د زعفرانو تولید نږدې ۲۰ ټنو ته ورسېد
۴ مرغومی ۱۳۹۸
د وروستي راټول شوي او توحید شوي شمېرو له مخې، په روان کال کې د زعفرانو د تولید کچه ۲۲ سلنه زیاته شوې او ۱۹ زره او ۴۶۹ کیلوګرام ته رسېدلی دی.
د کرنې وزارت ویاند اکبر رستمي وایي: «سږکال په ترویجي او تولیدي ډول د ټول هېواد په اووه زره او ۵۵۷ هکټاره ځمکه کې زعفران کرل شوې ده، چې د تېرکال په پرتله د تولید کچه نږدې ۲۲ سلنه زیاته شوې ده؛ دا په داسې حال کې ده، چې تېر کال په شپږ زره او ۲۷۲ هکټاره ځمکه کې زعفران کرل شوې وه، چې د تولید کچه یې ۱۶ ټنو ته رسېدلې وه.»
ښاغلی رستمي وايي، د شمېرو له مخې هرات، بلخ، کندهار، ارزګان، دایکندي اوسرپل په ترتیب سره هغه ولایتونه دي چې تر ټولو ډېر زعفران یې تولید کړي دي. د زعفرانو تر ټولو ډېرې کروندې د هرات په ولایت کې ده، چې اووه زره هکټارو ته رسیږي.
دغه راز په بلخ کې ۹۹.۵ هکټاره، په فاریاب کې ۴۶ هکټاره، په کندهار کې ۴۵ هکټاره، په ارزګان کې ۳۹ هکټاره، په دایکندي کې ۳۱ هکټاره او په سرپل ولایت کې په ۲۱ هکټاره ځمکه کې زعفران کرل شوې ده. په نورو ولایتونو کې د زعفرانو کروندې د یادو ولایتونو په پرتله لږ دي.
د کرنې وزارت د وایند په خبره د افغانستان د زعفرانو د تولید د زیاتوالی عمده لاملونه، د زعفرانو کروندې زیاتېدل، د کرنې وزارت چوپړونه لکه بزګرانو ته روزنه ورکول، د زعفرانو د ښه کیفیت لرونکي پیازو وېش او بزګرانو لپاره د زعفرانو نندارزې قطعې جوړول دي.
باید وویل شي، چې روان کال د کابل، غزني، فاریاب او هرات په ولایتونو کې د زعفرانو د پروسس څلور مرکزونه تجهیز شوي دي او دغه راز څه باندې دوه زره نارینه او ښځینه زعفران کاران روزل شوي دي.
اکبر رستمي وایي، چې د افغانستان د زعفرانو له سږنۍ تولید څخه سل نمونې د کیفیت د ارزونې په پار د هېواد په معیاري او اسټنډرډو لابراټوارو نو کې تر ازمایښت لاندې نیول شوي دي، چې په پایله کې، یې کیفیت له نړیوالو سټنډرډونو لوړ ثابت شوی دی. د دغو ازمایښتونو د پایلو پر اساس، افغانستان د نړۍ تر ټولو ښه کیفیت لرونکي زعفران تولیدوي.
د هغه په خبره، شمېرې ښیي، چې سږکال د افغانستان زعفران کاران له خپل کاروباره څه باندې ۲۷ میلیونه ډالر لاسته راوړي.
د کرنې وزارت د زعفرانو د ودې او پراختیا په پار په ۱۳۹۵ یم کال کې پنځه کلنه برنامه ترتیب کړ، چې پر بنسټ یې په هېواد کې د زعفرانو د تولید کچه تر ۱۴۰۰ ام لمریز کاله پورې باید ۱۴ ټنو ته ورسیږي، خو د زعفرانو د تولید کچه ښیي ، چې د کرنې وزارت د زعفرانو د ودې په پار د ټولو پرنامو په پلي کولو سره توانېدلې ده، چې له ټاکلي مودې یو کال مخکې یعنې ددې پنځه کلنې برنامې له وړاندویونو یو کال مخکې شپږ ټنه زیات تولید ولري.