د کرنې په وزارت کې د کرنیزو تخمونو د بورډ غونډه دایره شوه
د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدراعظم عثماني په مشرۍ د کرنیزو تخمونو د بورد غونډه د ملګرو ملتونو د خوړو او کرنې ادارې «اف.اې.او» استازی، د کرنیزو تخمونو تولیدوونکو شرکتونو او د اصلاح شوو نیالګیو د تولیدي شرکتونو د استازو په ګډون د دې وزارت په مقر کې ترسره شوه.
په یاده غونډه کې څارويو لپاره د علوفې د برابرولو، د نويو علوفو د ورایټیو پېژندنې، څېړنیز او ازمایښتي تجربو، د تصدیق شوو مېوهلرونکو نیالګیو د تولید او د تصدیق شوو مورني تخمونو د تولید په هکله خبرې اترې وشوې او همدارنګه دکرنې وزارت د کرنیزو تخمونو د تصدیق ریاست له خوا د کرنیزو تخمونو د تولیدوونکو شرکتونو د ارزونې راپور وړاندې او په یادو برخو کې ګډونوالو خپل وړاندیزونه وړاندې او نظرونه تباله کړل.
مولوي عثماني په خپلو پرانیستونکو خبرو کې د تخم پر ارزښت او دغه راز د تولیدي شرکتونو پر شفاف او معیاري فعالیت ټینګار وکړ. نوموړي له اړوندو ادارو وغوښتل، چې د لوړ کیفیت لرونکو نیالګیو تولید، د اړوندو ادارو ترمنځ همغږۍ او د څارويو لپاره معیاري او صحي علوفې برابرولو ته جدي پاملرنه وکړي، څو بزګران او عام خلک ترې هر اړخیزه ګټه پورته کړي.
د غونډې په پای کې ګډونوالو خپلې نظریې او وړاندیزونه د بحث شوو موضوعاتو په تړاو وړاندې کړل او د بحث اړوند اړینې پریکړې تصویب شوې.
