فراه کې د سربندونو او استنادي دېوالونو رغنیزې چارې ۹۰ سلنه بشپړې شوې

۲۴ وږی ۱۴۰۴ هـ.ش
۲۲ رَبِیعُ الْأَوَّل ۱۴۴۷ هـ.ق 
د فراه ولایت د کرنې، اوبولګولو او مالدارۍ ریاست د یاد ولایت د اوبو لګولو د سیستم د پیاوړتیا او د کرنیزو ځمکو د خوندیتوب په موخه پراخ رغنیز کارونه تر سره کړي دي. د همدې موخې لپاره د یاد ریاست رییس مولوي پیرمحمد حلیمي په لارښوونه د انجینري ټیم او کرنې متخصصینو د بالابلوک او فراهرود ولسوالیو په بېلابېلو سیمو کې د سربندونو، استنادي دېوالونو او پلچکونو د رغنیزو چارو له نږدې څارنه او هر اړخیزه کتنه وکړه.
یاده پروژه د ملګرو ملتونو دخوړو او کرنې ادارې «اف.اې.او» په مالي ملاتړ او د کرنې ریاست په همغږۍ عملي کېږي. د دې پروژې له مخې په بالابلوک ولسوالۍ کې د کنسک په سیمه کې یو سربند د ۸۵ مترو په اوږدوالي، ۲ متره سور، ۳.۷ متره لوړوالي، ۱۴ متره استنادي دېوال او پنځه پلچکونه جوړېږي. همدا راز، په فراهرود ولسوالۍ کې د تودنک په سیمه کې یو بل سربند د ۹۵ مترو په اوږدوالي، ۲ متره سور، ۳.۵ متره لوړوالي، ۹۰۰ متره اوږد استنادي دېوال او پنځه پلچکونه په اساسي ډول رغول کېږي.
د دې پروژو د عملي کېدو پر مهال ماهرو او غیرماهر کارګرو ته د کار زمینه هم برابره شوې ده. چارواکي وایي، چې تر اوسه د دغو پروژو رغنیزې چارې شاوخوا ۹۰ سلنه بشپړ شوي او ډېر ژر به رسماً ګټې اخیستنې ته وسپارل شي.
د فراه ولایت د کرنې، اوبولګولو او مالدارۍ ریاست ټینګار کوي، چې د خپلو ټولو پروژو په وخت څارنه کوي او د کیفیت لوړتیا ته یې ځانګړې پاملرنه کوي، څو د کرنیزو چارو د ودې ترڅنګ د سیمه‌ییزو خلکو اقتصادي وضعیت هم ښه شي.