د کرنې او مالدارۍ مرستیال د ملګرو ملتونو د خوړو او کرنې ادارې له چارواکو سره وکتل

 ۲۰ وږی ۱۴۰۴ هـ.ش
۱۸ رَبِیعُ الْأَوَّل ۱۴۴۷ هـ.ق
د کرنې او مالدارۍ مرستیال مولوی صدراعظم عثماني د ملګرو ملتونو د خوړو او کرنې ادارې «اف.اې.او» د پروګرامونو عمومي رییس کوسټوب ډیوالي او د تخمونو عمومي رییس شان مګګیر سره د کرنیزو څیړنو انسټیټیوټ د عمومي رییس او د ترویج د عمومي رییس په شتون کې وکتل.
په دې لیدنه کې، چې د کرنې او مالدارۍ د معینیت یو شمېر رئیسان او مسلکي سلاکاران هم حاضر وو، د ګډو چارو او راتلونکو پلانونو په اړه بحث او نظرونه تبادله شول.
د کرنې او مالدارۍ مرستیال مولوی صدراعظم عثماني ټینګار وکړ، چې د دواړو ادارو پلانونه باید د خلکو د اړتیاوو پر بنسټ عملي شي، تر څو افغانستان د اقلیم د بدلون، وچکالۍ او طبیعي آفتونو له ګواښونو خوندي پاتې شي او بزګرانو او مالدارانو ته د هغوی د اړتیاوو مطابق چوپړتیاوې وړاندې شي.
همدارنګه په دې ناسته کې د ستراتیژیکو نباتاتو د تخمونو د برابرولو په اړه خبرې وشوې. ګډونوالو څرګنده کړه، چې په تېرو کلونو کې تر ډېره د غنمو پر تخم کار شوی دی او له دې وروسته باید د جوارو، سویا بین، عدس، ږدن، ممپلۍ، نخود او نورو نباتاتو د تخمونو پر برابرولو هم تمرکز وشي.
په همدې موخه، پرېکړه وشوه چې د یادو برخو د کارکوونکو د وړتیا لوړولو او لا زیاتې همغږۍ لپاره یوه تخنیکي کمیټه وګومارل شي.