د هلمند نادعلي کې د اقلیمي بدلونونو د اغېزو د کنترول او عامه پوهاوي پروګرام ترسره شو

۱۹وږی ۱۴۰۴ هـ.ش
۱۷ رَبِیعُ الْأَوَّل ۱۴۴۷ هـ.ق
د کرنې، اوبو لګولو او مالدارۍ وزارت د اقلیمي بدلونونو له امله د زیانمن شویو سیمو د کنترول او عامه پوهاوي په موخه یو ورځنی سیمینار د هلمند ولایت په  نادعلي ولسوالی کې ترسره کړ. په دغه پروګرام کې د نادعلي ولسوالی ګڼ شمېر کروندګرو ګډون کړی و.
د هلمند دکرنې ریاست استازی د پرانیستونکې وینا پر مهال د اقلیمي بدلونونو پر وړاندې د مبارزې اهمیت یاد کړ او د وزارت له راغلي پلاوي یې هرکلی وکړ.
د کرنې، اوبو لګولو او مالدارۍ وزارت پلاوي د اجنډا مطابق د روزنیز پروګرام ټول موضوعات په تفصیل سره وړاندې کړل. ګډونوالو ته د اقلیمي بدلونونو د اغېزو، د زیانمنو سیمو د کنترول لارو چارو او د کرنیزو تطبیقي میتودونو په اړه مفصل معلومات ورکړل شول.
ګډونوالو د پروګرام هرکلی وکړ او ټینګار یې وکړ چې دغه ډول پوهاوی پروګرامونه کولی شي د کرنیزو زیانونو د کمولو او د کروندګرو د عملي مهارتونو د لوړولو لامل شي.
باید وویل شي، چې د اقلیمي بدلون اړوند د پوهاوي دغه لړۍ به یوازې په نادعلي کې نه، بلکې د هلمند د نورو ولسوالیو بزګرانو ته هم وغځېږي.