کندز کې له ۲۰۰ زیانمنو کورنیو سره د سبو، مېوو او لبنیاتو د پروسس وسایلو مرسته وشوه
۱۵ وږی ۱۴۰۴ هـ.ش
۱۳ رَبِیعُ الْأَوَّل ۱۴۴۷ هـ.ق
د ژغورنې نړۍوالې کمېټې «آی.آر.سي» د کندز د کرنې، اوبولګولو او مالدارۍ ریاست په همغږۍ سره، د سبو، مېوو او لبنیاتو د پروسس وسایل د کونډو او بېسرپرسته کورنیو لپاره په دشت ارچي او امام صاحب ولسوالیو کې ووېشل.
د پروګرام له مخې، ۱۰۵ کورنۍ په دشت ارچي او ۹۵ کورنۍ په امام صاحب کې له یادو مرستو برخمنې شوې. یاد وسایل په ځانګړي ډول د هغو کورنیو لپاره برابر شوي، چې د عاید سرچینې یې محدودې دي او د خپل ژوند د ښه والي لپاره د پروسس په برخه کې د کوچنیو کاروبارونو د رامنځته کولو وړتیا لري.
مسؤولینو وویل، دغه مرسته نه یوازې د کورنیو د اقتصادي ستونزو په کمولو کې مرسته کوي، بلکې د پروسس په برخه کې د عاید وړو فرصتونو د رامنځته کولو لپاره یوه مهمه هڅه ده.
ګډونوالو د مرستو له وېش څخه خوښي وښوده او ټینګار یې وکړ چې دغه ډول برنامې د کورنیو د ځان بسیاینې او د سیمهییز اقتصاد د پیاوړتیا لپاره ارزښتناک رول لري.
د کرنې، اوبو لګولو او مالدارۍ وزارت د هېواد په کچه د کرنیزو محصولاتو د پروسس او بستهبندۍ پراختیا ته ځانګړې پاملرنه کوي. دغه پروسه نه یوازې د کورنیو د عایداتو په لوړولو کې مرسته کوي، بلکې د کرنیزو توکو د ضایع کېدو مخنیوی هم کوي او د کورنیو د اقتصاد د پیاوړتیا لپاره اغېزناک رول لري.
