۲۵ لېندۍ ۱۳۹۸
د پکتیکا د کرنې، ابولګولو او مالدارۍ ریاست چارواکي وایي، چې ددې ولایت په مرکز ښرنه کې د زیرې ننداریزې قطعې جوړې شوې وې، چې حاصلات یې ښه او دقناعت وړ دي.
د پکتیکا د کرنې ریاست وایي، چې دکرنې وزارت د بڼوالۍ او مالدارۍ ملي برنامې په همکارۍ په دې ولایت کې د زیرې د کرکيلې د دودولو په پار د زیرې ننداریزې قطعې جوړې شوي، چې حاصلات یې ښه او بزګران دې ته لېوال شوي دي، چې په خپلو ځمکو کې د زیرې کرکېله وکړي.
د پکتیکا د کرنې ریاست چارواکي وایي، چې له یو جریبه ځمکې څخه ۱۵۰ تر ۲۰۰ کیلو ګرامه زیره تر لاسه شوې، چې من یې شاوخوا په ۱۸۵۰ افغانۍ پلورل کیږي.
زیره، چې په اصل کې یو غرنۍ بوټی دی، ځانګړې اقلیمي شرایطو ته اړتیا نه لري، نو په همدې موخه د افغانستان په ډېرو سیمو کې یې کرکېله دود شوې ده. له زیرې څخه په خوړو او طبابت کې ګټه اخیستل کیږي.