د لغمان دکرنې رییس د خوړو او کرنې ادارې او اسلامي پراختیایي بانک له چارواکو سره د همکاریو پر پراختیا خبرې وکړې

۸ چنګاښ ۱۴۰۴ ه‍.ش
۳ مُحَرَّمُ الحَرام ۱۴۴۷ه‍.ق
د لغمان د کرنې، اوبولګولو او مالدارۍ رییس الحاج مولوي عبدالستار محمد د ملګرو ملتونو د خوړو او کرنې ادارې «اف،اې،او» او د اسلامي پراختیایي بانک له چارواکو سره په کتنه کې د همکاریو پر پراختیا خبرې اترې وکړې. 
په دې لیدنه کې د اسلامي پراختیايي بانک چاراکي عبدالقهار امینوف،عطاالرحمن رحمت،حمیدعاطف او د ملګرو ملتونو د خوړو او کرنې ادارې «اف،اې،او» د ختیځ زون مسؤل خوشحال اصفي، د قرغیو ولسوالۍ یو شمېر بڼوال، بزګران او مالداران ګډون درلود.
د کتنې په ترڅ کې د کرنې په بېلابېلو برخو کې د همکاریو پر پراختیا خبرې وشوې. د لغمان د کرنې رییس الحاج مولوي عبدالستار محمد د راغلي پلاوي هرکلی وکړ او د ملګرو ملتونو د خوړو او کرنې ادارې «اف،اې،او»  له خوا د لغمان ولایت د کرنې او مالدارۍ سکتور ته د ورکړل شوي مالي او تخنیکي ملاتړ ستاینه وکړه. نوموړي د ولایت اقتصادي وضعیت تشریح کړ او زیاته یې کړه، چې د لغمان ډېری اوسېدونکي په کرنه او مالدارۍ بوخت دي، خو دا ولایت له اقتصادي پلوه لا هم له نورو ولایتونو وروسته پاتې ده.
هغه د ملګرو ملتونو د خوړو او کرنې ادارې «اف،اې،او» او اسلامي پراختیایي بانک چارواکو څخه وغوښتل، چې د غنمو اصلاح شوي تخمونو، کیمیاوي سرې، سوداګریزې شنې خونې او بڼونه، د اوبو لګولو شبکې، د سبو او مېوو د پروسس وسایل، په ځانګړې توګه د الینګار او الیشنګ سیندونو ترڅنګ د کبانو فارمونه، د څارویو لپاره متراکمې خوراکې، نسلي وزې او د تبې وقایوي واکسین تطبیق برخه کې مرسته وکړي. نوموړي ټینګار وکړ چې دا ډول مرستې به د بزګرانو او مالدارانو په اقتصاد کې مثبت بدلون راولي.
په پای کې، د ملګرو ملتونو د خوړو او کرنې ادارې «اف،اې،او» او د اسلامي پراختیایي بانک پلاوي د لغمان د کرنې ریاست له مشرتابه څخه د ښې همغږۍ او همکارۍ مننه وکړه او ژمنه یې وکړه، چې په یادو برخو کې به نوې پرمختیایي پروژې تصویب کړي.