هلمند کې د نباتي ناروغیو مخنیوي په اړه بزګرانو ته روزنه ورکول کېږي
۳ غویی ۱۴۰۴ ه.ش
۲۵ شَوّالُ المُکَرَّم ۱۴۴۶ه.ق
دهلمند ولایت د کرنې، اوبو لګولو او مالدارۍ ریاست د بوټو ساتنې او قرنطین عمومي مدیریت تر چتر لاندې د نباتي ناروغیو مخنیوي مدیریت له لوري د مرکزي سیمې یوشمېر کروندګرو او پالیزوانانو ته د غنمو، بینډیو او بادرنګو په ګډون د غلودانو او سبو د فنګسي ناروغیو د وقایې او مخنیوي په موخه هراړخیز معلومات وړاندې شو.
په دې روزنیزه پروسه کې، بزګرانو ته روښانه شوه، چې د بینډیو او بادرنګو ګډه کرنه باید ونه شي، ځکه بادرنګ د فنګسي ناروغۍ ښکار شوی و، او ګډه کرنه د ناروغیو د پراخېدو لامل ګرځي. متخصصینو بزګرانو ته بدیل نباتات هم معرفي کړل چې ښه حاصل ورکوي او ناروغیو ته کم حساسیت لري.
بزګرانو ته د بوټو ساتنې مسؤلینو زیاته کړه: «داچې سږکال د غنمو په کرونده کې د تېر کال په پرتله د فنګسي ناروغیو پیښې کمې وې. د دې ښه وضعیت عمده لامل د وقایوي تدابیرو لکه د تیرام او کپتان دواړو درملو سره د غنمو د تخم درملنه وه، چې د ناروغیو د مخنیوي لپاره ګټوره تمامه شوې ده.»
بزګرانو د دغو معلوماتو هرکلی وکړ، او ژمنه یې وکړه چې یادې سپارښتنې به په خپلو کروندو کې پلي کوي.
