کندهار کې د تېرو کلونو په پرتله سږکال د غنمو کروندې ډېرې شوي

د کندهار د کرنې، اوبو لګولو او مالدارۍ ریاست اړوند د کرنیزو چارو آمریت وایي، چې سږ کال په دغه کندهار کې د غنمو کرنې کچه لوړه شوې، چې ور سره بزګرانو ته د ښه حاصل هیله پیدا شوې.   یاد آمریت زیاتوي، چې سږ کال د غنمو آفتونه نه دي لیدل شوي او بزګران تمه لري چې له خپلو ځمکو څخه به د پام وړ حاصل ترلاسه کړي.
د کندهار دکرنې ریاست د کرنیزو چارو آمر مولوي شمس الرحمن موسی وایي، چې سږ کال په کندهار ۱۸ ولسوالیو کې پر ۹۸ زره ۳۸۲ هکټاره ځمکه غنم کرل شوي، چې له دې ځمکو څخه به شاوخوا ۳۶۸ زره ۹۳۱ ټنه حاصل ترلاسه شي. نوموړی زیاتوي، چې د تېر کال په پرتله سږ کال د غنمو کرنه ۲ زره هکټاره زیاته شوې ده.
مولوي موسی وايي؛ چې سږ کال د غنمو آفات او ناروغۍ په بېسارې توګه کمې شوي دي او دا چاره د دې لامل شوي، چې د حاصلاتو د زیاتوالي تمه هم لوړه شي.
نوموړی سږ کال د غنم کرنې او حاصلاتو زیاتوالي عمده لاملونه، د بزګرانو سره د اصلاح شویو تخمونو او کیمیاوي سرې مرستې، مسلکي روزنیز پروګرامونه، د اوبو زیاتوالي او د آفتونو مؤثر کنټرول یادوي.
د یادونې وړ ده، چې تېر ۱۴۰۳ لمریز کال کندهار کې پر ۹۶ زره ۳۷۸ هکټاره ځمکه غنم کرل شوې وه، چې له دغو کروندو څخه ۳۶۱ زره ۴۳۲ ټنه حاصل ترلاسه شوې وه. سږ کال نه یوازې د کرنې کچه زیاته شوې، ترڅنګ یې د حاصلاتو په کچه کې هم د پام وړ زیاتوالی تمه شته.