د کندهار دوو ولسوالیو کې ۱۳ شنې خونې ګټې اخیستنې ته وسپارل شوې
۲۸ وری ۱۴۰۴ ه.ش
۱۹ شَوّالُ المُکَرَّم ۱۴۴۶ه.ق
د کندهار د کرنې، اوبولګولو او مالدارۍ رياست مسوولین وايي، چې د دغه ولایت د ډنډ او دامان په ولسواليو کې ۱۳ شنې خونې جوړ او ګټې اخيستنې ته وسپارل شول. د دغه ولایت د کرنې، اوبولګولو او مالدارۍ ریاست چارواکي وايي، چې دغه شنې خونې د کرنې، اوبو لګولو او مالدارۍ وزارت د بدیل معیشت پراختیایې بودیجي له لاري جوړې شوې، چې په کې تازه سابه توليدېږي.
ورته مهال د یادو سیمو یو شمېر اوسېدونکي د يادو خونو په جوړېدو خوښ دي او وايي، چې له دې وړاندې به د یادو سیمو خلک د سبو له کمښت سره مخامخ کېدل او هم به يې وخت نا وخت بیې لوړېدلې.
د کندهار دکرنې ریاست چارواکي وایي، په ټولو موسمونو کې سابه او ترکاریو ته د کندهار د خلکو د لاس رسي، د موسمي تولیداتو زیاتوالی او په بازارونو کې د کرنیزو حاصلاتو د ډېرښت په پار په دې ولایت کې شنې خونې جوړې شوي دي.
د یادو شنو خونو د جوړولو موخه بدیل معیشت یا د کوکنارو بدیل کرکېله، په سړه موسم کې د سبو حاصلات ترلاسه کول، میکانیزه کرنې ته وده او پراختیا ورکول، د بزګرانو ملاتړ، د هغوي اقتصادي وضیعت پیاوړي کول او بزګرانو ته د کار زمینه برابرول دي.
