ننګرهار کې د نارنج ګل تر نامه لاندې درې ورځنی نندارتون پای ته ورسېد

د ننګرهار ولایت په مرکز جلال‌اباد ښار کې د نارنج ګل تر نامه لاندې درې ورځنی نندارتون، چې د کورنیو او داخلي تولیداتو د معرفي او بازار موندنې په موخه جوړ شوی و، پای ته ورسېد. دغه نندارتون د سراج العمارت تاریخي بڼ کې ترسره شو.
په یاد نندارتون کې د ننګرهار وادي کرنیز امارتي شرکت ګډون کړی و او خپل تولیدات او کرنیز محصولات یې د نندارې لپاره وړاندې کړي وو، چې د ګډونوالو له خوا یې پراخ هرکلی ترلاسه کړ.
د نندارتون په وروستۍ ورځ د ننګرهار د صنعت او سوداګرۍ ریاست او د سيکارام احمدي بازار موندنې شرکت له لوري د ننګرهار وادي کرنیز امارتي شرکت فعال حضور او غوره کړنې وستایل شوې او ورته ستاینلیک هم ورکړل شو.
چارواکو او ګډونوالو دا ډول نندارتونونه د تولیداتو د معرفي، د کورني صنعت د ودې، بازار موندنې او اقتصادي پراختیا لپاره مهم او اغېزناک وبلل.
نارنج ګل نندارتون هر کال د پسرلي په موسم کې د ننګرهار ولایت په مرکز جلال‌اباد ښار کې د کورنیو تولیداتو د معرفي او بازار موندنې لپاره ترسره کېږي. دا نندارتون نه یوازې د تولیدوونکو او صنعتکارانو ترمنځ د اړیکو د ټینګښت زمینه برابروي، بلکې د سیمه‌ییز اقتصاد د پیاوړتیا لپاره هم مهم رول لري.