پټان کې د حیواني محصولاتو د قرنطین ودانۍ ګټې اخیستنې ته وسپارل شوه

۱۳ لېندۍ ۱۳۹۸
د کرنې، اوبولګولو او مالدارۍ وزارت له خوا د پکتیا ولایت د پټان ولسوالۍ لپاره د حیواني محصولاتو د قرنطین د نوی ودانۍ د جوړولو چارې بشپړ او ددې ولایت والي شمیم خان ګټوازي، د کرنې رییس او یوشمېر نورو سیمه ییزو چارواکو په شتون کې رسماً ګټې اخیستنې ته وسپارل شوه.
د پکتیا ولایت د کرنې، اوبولګولو او مالدارۍ ریاست چارواکي وایي، دغه یوه پوړیزه ودانۍ په پاخه او اساسي ډول رغول شوې ده، چې په کې اداري خونې، د لابراتوار خونه، پخلنځی، دوه تشنابونه او بشپړ دفتري تجهیزات شامل دي.
ددې ودانۍ د جوړولو ټولیز لګښت پنځه میلیونه او ۱۳۵ زره او ۹۵ افغانۍ ده، چې د کرنې وزارت له پراختیایي بودیجې څخه ورکړل شوې ده.
د پکتیا والي شمیم خان ګټوازی وویل، چې ددې ودانۍ په جوړېدو سره په دې ولایت کې د حیواني محصولاتو د قرنطین په چارو کې کڼ اسانتیاوې رامنځته کیږي.