کندهار کې پر لسګونو بزګرانو د لوبیا اصلاح شوي تخمونه او کیمیاوي سرې ووېشل شوې
۶ وری ۱۴۰۴ ه.ش
۲۶ رَمَضانُ المُبارَک ۱۴۴۶ه.ق
د کندهار د کرنې، اوبو لګولو او مالدارۍ ریاست په همغږۍ له جرمونو او مخدره توکو سره د ملګرو ملتونو د مبارزې دفتر (یو. ان. او. ډې. سي) په مالي او د هالنډ کمېټې په تخنیکي همکارۍ، د کندهار په ارغستان، لوړ شاولیکوټ، کښته شاولیکوټ، خاکریز او غورک ولسوالیو کې پر ۱۶۰ بېوزله بزګرانو د لوبیا اصلاح شوي تخمونه او کیمیاوي سرې ووېشل شوې.
ددې مرستې په ترڅ کې، ۵۰ تنه د ارغستان، ۲۰ تنه د لوړ شاولیکوټ، ۲۰ تنه د کښته شاولیکوټ، ۴۰ تنه د خاکریز، او ۳۰ تنه د غورک ولسوالیو اړمن بزګران شامل وو، چې هر بزګر ته ۲۰ کیلوګرامه د لوبیا اصلاح شوي تخمونه او ۲۵ کیلوګرامه توره سره ورکړل شوه. تمه ده، چې په نږدې راتلونکي کې به ورته سپینه سره هم ووېشل شي، ترڅو د روان فصل لپاره د لوبیا کرنه وکړي.
د دې مرستې ترڅنګ، بزګرانو ته د لوبیا د کر کیلي او غوره میتودونو په اړه روزنه هم ورکړل شوه، ترڅو د روان فصل په جریان کې یې کرنه مؤثره او حاصلات یې زیات شي.
د دې پروګرام موخه د اړمنو بزګرانو ملاتړ، د اصلاح شویو تخمونو ترویج، د میکانیزه کرنې دودول، د کرنیزو حاصلاتو لوړول، او بزګرانو ته د کار زمینې برابرول دي.
د یادونې وړ ده، چې د کندهار د کرنې، اوبو لګولو او مالدارۍ ریاست تر رهبرۍ لاندې، د هالنډ کمېټې د مالدارۍ په برخه کې هم خپل فعالیتونه چټک کړي دي، چې ددغو هڅو په لړ کې، د کندهار ولایت د ارغستان، لوړ شاولیکوټ او خاکریز ولسوالیو کې لسګونه زره څارویو ته د چنجیو ضد ناروغیو په وړاندې د درمل ورکولو کمپاین هم پیل شوی دی.
