ننګرهار کې د ۳.۶ میلیونه افغانیو په لګښت د اوبو شبکو جوړولو چارې پیل شوې
د ننګرهار د کرنې، اوبو لګولو او مالدارۍ ریاست سره په همغږۍ د ملګرو ملتونو پراختیایي ادارې (یو این ډې پي) په همکارۍ د ۳.۶ میلیونه افغانیو په لګښت ددې ولایت د کامې او بهسودو په ولسوالیو کې ځمکو ته د اوبو رسولو د اتو شبکو جوړولو چارې پیل شوې.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د یادو شبکو په مرسته به ۲۰۰ جریبه هغه ځمکې چې اوبه ورته نه رسیدلې او د کانال سطحې څخه په لوړه ارتفاع کې پرتې دې خړوبي شي.
نوموړې زیاته کړه، چې د اوبو هره شبکه د ۳۵ زره لیټرو اوبو د ساتلو ظرفیت لري، چې دلمریزو تختو په مرسته به د کانال څخه اوبه شبکو ته او له هغه ځایه به په منظم ډول ځمکو ته ووېشل شي.اوهمدارنګه د شبکو په جوړېذړ کې به د سیمې ۱۵۰ تنو ته د کار زمینه هم برابره شي.
د یادو شبکو جوړولو موخه د اوبو ښه مدیریت، دبزګرانو اقتصادي پیاوړتیا اود خوړو خوندیتوب رامنځته کول دی.
