د کندهار کوهکران څېړنیز فارم کې د مېوو کلکسیون او ژمني کرنیزې عملیې بشپړې شوې
د کندهار د کرنې اوبو لګولو او مالدارۍ ریاست تر رهبرۍ لاندې د کوهکران څېړنیز فارم د مسلکي انجنیرانو له لوري د مېوو کلکسیون په موخه د یاد فارم ټولې ژمني کرنیزې عملیې بشپړې شوې، چې موخه یې د راتلونکي کال لپاره د مېوه لرونکو ونو ساتنه، وده د مېوو د څېړنې لپاره تصمیم نیونه ده.
د کرنیزو عملیو په لړ کې، د ځمکې قلبه او اړول، د د ناروغیو کنترول، ښاخونو متوازنې ودې په پار د انارو، انګورو او یو شمېر نورو مېوو د ونو شاخهبرۍ، او بڼونو څخه د آفتونو او فنګسي ناروغیو د ساتني او مخنیوي لپاره د ژمني تېلو او لایم سلفر استعمال ترسره شو.
همداراز، د انارو، شفتالو، بادام، او زردالو ننداریزو بڼونو کې د رشقې کرنه ترسره شوه، بڼونو ته کیمیاوي ډي پي (توره سره) ورکړل شوه.
سربېره پر دې، د قوریو لپاره بسترونه چمتو شوي، چې د روانې اوونۍ تر پای ته رسېدو پورې به قلمې پکې کېښودل شي. او همدارنګه د شفتالو او آلو د کلکسیون د ګل ډاټا نیونه هم پیل شوي، چې دا ګل نیونه به په منظم ډول دوام وکړي.
د یادونې وړ ده، چې د کندهار کوهکران څېړنیز فارم کې به د راتلونکي لمریز کال په جریان کې پر بېلابېلو مېوه لرونکو نباتاتو څېړنې ترسره شي، چې په یادو څېړونو کې ۱۴ ورایټۍ د بې دانو انار او ۸ ورایټۍ انځر هم شامل دي.
