کندهار کې پر سلګونه جریبه ځمکه د چهارمغزو بڼونه جوړېږي
د کرنې، اوبو لګولو او مالدارۍ وزارت د پراختیایي بودیجه له لارې، د کندهار د کرنې اوبو لګولو او مالدارۍ ریاست په مشرۍ او د طبیعي سرچینو آمریت په تخنیکي همکارۍ، د معروف ولسوالۍ په ۲۳۴ جریبه ځمکه د ۴۹۲ زره افغانیو په ارزښت د چهارمغز بڼونه جوړېږي.
د دغو بڼونو جوړېدو لپاره شپږ زره د چهارمغز نیالګي ۵۲ بزګرانو ته ځانګړي شوي، چې هر بزګر ته به د ۴.۵ جریبه ځمکې پر مساحت یو بڼ جوړ شي. د یادو بڼونو د جوړېدو چارې به په نږدې راتلونکو اونیو کې پیل شي، چې له مخې به د معروف ولسوالۍ ۵۲ بزګرانو ته به د چهارمغز بڼونه جوړ شي.
د دغو بڼونو د جوړېدو موخه د معروف ولسوالۍ بزګرانو ته د بڼوالۍ اسانتیاوې برابرول، د بېوزلو بزګرانو مالي ملاتړ، د چهارمغز مېوې ته پراختیا ورکول، د بزګرانو اقتصادي وده، او همدارنګه د کاري فرصتونو برابرول دي.
د یادونې وړ ده، چې د کندهار د کرنې ریاست په دې وروستیو کې د مېوه لرونکو بڼونو د ودې او پراختیا لپاره خپل فعالیتونه زیات کړي دي. د همدې لړۍ په دوام، د کندهار پنجوایي ولسوالۍ کې هم ۵۷ بزګرانو ته د املوکو او پلمو بڼونه جوړېږي، چې چارې یې دا مهال په چټکۍ روانې دي.
