د کرنې وزارت پلاوی په کندهار کې د چرګانو دانې تولیدي کارخونو څخه لیدنه وکړه
د کرنې، اوبو لګولو او مالدارۍ وزارت یو ګډ پلاوی، چې د طیور، حشراتو او کبانو روزنې لوی رییس او د چرګانو د روزنې عمومي مدیران یې غړي دي، کندهار ولایت ته د خپل سفر په ترڅ کې د چرګانو د داني تولیدي کارخونو څخه څارنه وکړه او د چارواکو سره یې اړوند موضوعات وڅېړل.
یاد پلاوی د کندهار د مالدارۍ آمریت په ملتیا، شاوخوا لس تولیدي کارخونې وکتلې. د دې څارنې پر مهال، د کارخونو تنظیم، د چرګانو د دانې خام مواد، د چرګانو د خوراکي ډولونه، تولیدي ماشینرۍ، د دانې کیفیت او ظرفیت و ارزول شو. د څارنې په پای کې، پلاوي د هرې کارخونې څخه ازمایښتي نمونې واخیستې، چې د کرنې وزارت په لابراتوار کې به د ټیسټ وروسته د دانې کیفیت وڅېړل شي.
همدارنګه، د کارخونو چارواکو د ځمکې، کاریګرو، اوبو او بازارموندنې اړوند ستونزې له پلاوي سره شریکې کړې، ترڅو د حل لپاره لازم اقدامات وشي. د کرنې وزارت پلاوي ژمنه وکړه، چې د دغو کارخونو د ودې او کورني تولید د ملاتړ لپاره به اقدامات ترسره کړي، ترڅو د سیمې اقتصاد پیاوړی او د وارداتو اړتیا کمه شي.
د یادونې وړ ده، چې د کندهار د ښوراندام صنعتي پارک شمالي او جنوبي سیمو کې د چرګانو د داني تولید لپاره لس کارخونې موجودي دي، چې د چرګانو دانې تولیدوي او هره ورځ په زیات شمېر دانه بازار ته وړاندې کوي.
