پکتیکا کې ۳۴۲ کوچنۍ شنې خونې ګټې اخیستنې ته وسپارل شوې 

د پکتیکا د کرنې، اوبولګولو او مالدارۍ رياست مسوولین وايي، چې د دغه ولایت د مرکز په ګډون په لسو ولسوالیو کې د ۴۱ میلیونه افغانیو په لګښت ۳۴۲ شنې خونې جوړ او ګټې اخيستنې ته وسپارل شول.
 د دغه ولایت د کرنې، اوبولګولو او مالدارۍ ریاست چارواکي وايي، چې دغه شنې خونې د کرنې وزارت د پراختیايي بودیجې او د همکارو مؤسسو له خوا جوړې شوې، چې په کې تازه سابه توليدېږي.
 ورته مهال د یادو سیمو یو شمېر اوسېدونکي د يادو خونو په جوړېدو خوښ دي او وايي، چې له دې وړاندې به د یادو سیمو خلک د سبو له کمښت سره مخامخ کېدل او هم به يې وخت نا وخت بیې لوړېدلې. دوی زیاته  کړه چې د دغو خونو په مټ به وکولای شي، چې د نورو هېوادونو څخه د سبو د واردولو اړتیا کمه شي.
د پکتیکا دکرنې ریاست چارواکي وایي، په ټولو موسمونو کې سابه او ترکاریو ته د پکتیکا د خلکو د لاس رسي، د موسمي تولیداتو زیاتوالی او په بازارونو کې د کرنیزو حاصلاتو د ډېرښت په پار په دې ولایت کې شنې خونې جوړې شوي دي.
د یادونې وړ ده، چې څو ورځې وړاندي هم د دغه ولایت د کرنې اواوبولګولو ریاست له خوا یوشمېر شنې خونې ګتې اخیستنې ته وسپارل شوې.