د کندهار لوړ میوند کې زرګونه څاروي د چنجیو ضد واکسین شول

د کندهار ولایت په لوړ میوند ولسوالۍ کې د چنجیو ناروغیو د مخنیوي په موخه ۶ زره کوچنیو څارویو ته د چنجیو ضد واکسین تطبیق شو.
یاد واکسین د کندهار د کرنې، اوبو لګولو او مالدارۍ ریاست په هڅه، د اروپايي ټولنې په مالي ملاتړ، د هالنډ کمیټې په تخنیکي همکارۍ، د مالدارۍ آمریت تر مستقیمې څارنې لاندې او د لوړ میوند ولسوالۍ د کرنې او مالدارۍ مسؤلینو په تطبیقي همکارۍ ترسره شو.
دا واکسین د درېیو اونیو په موده کې د پاراوټرانو له لوري کوچنیو څارویو ته تطبیق شو، چې موخه یې د مالدارانو ملاتړ، د مالدارۍ سکتور وده او پراختیا، د څارویو محصولاتو زیاتوالی، د مالدارۍ سکتور روغتیا ته پاملرنه او مسلکي کسانو ته د کاري فرصتونو برابرول دي..
د یادونې وړ ده، چې یوه اونۍ وړاندې هم د کندهار په غورک، پنجوایي، ارغستان، نېش، بولدک او خاکریز ولسوالیو کې لسګونو زرو کوچنیو څارویو ته ورته واکسین تطبیق شوی و.