د کندهار نېش کې یوشمېر بیوزله بزګرانو سره مرسته وشوه
۱۶ سلواغه ۱۴۰۳ه.ش
۵ شَعبان المُعَظّم ۱۴۴۶ه.ق
د کندهار دکرنې، اوبو لګولو او مالدارۍ ریاست په هڅه، د ملګرو ملتونو د خوړو او کرنې ادراې(ایف. اې. او) په مالې او د (ایچ. آر. ډې. اې) مؤسسې په تخنیکي همکاري د کندهار د نېش ولسوالی د کرنې او مالدارۍ مسؤلینو تر څارنې لاندې د یادې ولسوالی یوشمېر اړمنو بزګرانو سره د کرنیزو تخمونو، کیمیاوي سرو او دکرکیلې اړونده توکو مرسته ترسره شوه.
په دې مرسته کې، هر بزګر ته د دواپاشۍ ډبه، بیلچه، لور، ستل، رمبې، ګیلاس او د بېلابېلو سبو تخمونو ترڅنګ هر بزګر ته ۲۵ کیلو توره سره او ۲۵ کیلو سپینه سره هم ورکړل شوې ده.
له یادې مرستې سره به د بزګرانو د کرنیزو حاصلاتو کچه لوړه شي، له کمې ځمکې څخه به زیات حاصل ترلاسه کړي، د اصلاح شویو تخمونو او کیمیاوي سرو وېشل به د دوی په حاصلاتو کې د پام وړ زیاتوالی رامنځته کړي، چې له امله به بزګران د خپلو اقتصادي اړتیاوو د پوره کولو لپاره له کمې ځمکې څخه هم ښه ګټه پورته کړي.
په ورته وخت کې له دغې مرستې څخه برخمن شوي بزګران هم د کرنې ریاست او یادې ادارې څخه خوښ دی، چې ورسره په اړین وخت کې اړینې مرستې کېږي.
د یادونې وړ ده، چې تر دې وړاندې هم د کندهار دکرنې ریاست په هڅو او د ملګرو ملتونو د خوړو او کرنې ادارې په مالي ملاتړ، د نېش ولسوالی ۲ زره ۴۰۰ اړمنو بزګرانو ته اصلاح شوي تخمونه او کیمیاوي سره وېشل شوې وه.
