نورستان کې ۲۵۰ شنې خونې ګټې اخیستنې ته وسپارل شوې
۷ سلواغه ۱۴۰۳ھ.ش
۲۶ رَجَب المُرَجَّب ۱۴۴۶ه.ق
د نورستان د کرنې، اوبولګولو او مالدارۍ رياست مسوولین وايي، چې د دغه ولایت د کامدېش، برګمټال او دواب په ولسواليو کې ۲۵۰ شنې خونې جوړ او ګټې اخيستنې ته وسپارل شول. د دغه ولایت د کرنې، اوبولګولو او مالدارۍ ریاست چارواکي وايي، چې دغه شنې خونې د خوړو نړۍوال سازمان په مالي او د افغانستان راتلونکي نسلونو مؤسسې په تخنیکي همکارۍ جوړې شوې، چې په کې تازه سابه توليدېږي.
ورته مهال د یادو سیمو یو شمېر اوسېدونکي د يادو خونو په جوړېدو خوښ دي او وايي، چې له دې وړاندې به د یادو سیمو خلک د سبو له کمښت سره مخامخ کېدل او هم به يې وخت نا وخت بیې لوړېدلې.
د نورستان دکرنې ریاست چارواکي وایي، په ټولو موسمونو کې سابه او ترکاریو ته د نورستان د خلکو د لاس رسي، د موسمي تولیداتو زیاتوالی او په بازارونو کې د کرنیزو حاصلاتو د ډېرښت په پار په دې ولایت کې شنې خونې جوړې شوي دي.
