د کندهار لوړشاولیکوټ ولسوالی کې دوه زره بزګرانو ته د غنمو اصلاح شوی تخم او کیمیاوي سره ووېشل شوه

د کندهار ولایت د کرنې، اوبو لګولو او مالدارۍ ریاست په هڅو، د ملګرو ملتونو دخوړو او کرنې ادارې (ایف.اې.او) په همکارۍ، د لوړشاولیکوټ ولسوالۍ کرنې او مالدارۍ مسؤلینو تر څارنې لاندې دوه زره اړمنو بزګرانو ته د غنمو اصلاح شوی تخم او کیمیاوي سره د یوې شفافې پروسې له لارې ووېشل شوه.
په دې پروسه کې هغه بزګران مستحق وګڼل شول چې د ۲ څخه تر ۵ جریبه پورې ځمکه لري، اقتصادي وضعیت یې ضعیف دی او د تخم او سرې د پېرلو توان نه لري. هر کروندګر ته ۵۰ کیلوګرامه د غنمو اصلاح شوی تخم، ۵۰ کیلو سپینه سره او ۵۰ کیلو توره سره ورکړل شوه، څو بزګران د راتلونکي فصل لپاره پر وخت چمتو شي.
د دې مرستو موخه په کندهار کې د اصلاح شویو تخمونو دودول، د بزګرانو او ځمکوالو ملاتړ او له کمو ځمکو څخه د ډېرو حاصلاتو ترلاسه کول دي، چې د ولایت په کچه د کرنیزو تولیداتو د ودې لپاره مهم ګام دی.
په ورته وخت کې، د لوړ شاولیکوټ ولسوالی د مرستې څخه برخمن شوي بزګران هم د کندهار د کرنې ریاست او یادې ادارې څخه زیات خوښ دي، چې ورسره په اړین وخت کې اړینې مرستې کېږي.
د یادونې وړ ده، چې یوه اوونۍ وړاندې هم د کندهار سپین بولدک ولسوالی څه باندې ۱۲ سوه اړمنو بزګرانو سره د اصلاح شویو تخمونو او کیمیاوي سرې مرسته شوې وه.