د کندهار نېش کې سلگونو څارويو ته د چنجیو ضد واکسین تطبیق وشو
۲۹ مرغومې ۱۴۰۳ھ.ش
۱۸ رَجَب المُرَجَّب ۱۴۴۶ه.ق
د کندهار ولایت د کرنې، اوبو لګولو او مالدارۍ ریاست په هڅه او د اروپايي ټولنې په مالي ملاتړ، د هالنډ کمیټې په تخنیکي همکارۍ، د نېش ولسوالۍ ۱زر او ۵۰۰ کوچنیو څارویو ته د چنجیو ناروغیو د مخنیوي واکسین تطبیق شو. دا لړۍ د مالدارۍ آمریت تر مستقیمې څارنې او د نېش ولسوالۍ د کرنې او مالدارۍ مسؤلینو په تطبیقي همکاري ترسره شوه.
د دې واکسین تطبیق موخه د مالدارانو ملاتړ، د مالدارۍ سکتور وده او پراختیا، د څارویو محصولاتو زیاتوالی، د څارویو روغتیا ته پاملرنه او مسلکي کسانو ته کاري فرصتونه برابرول دي.
د نېش ولسوالۍ مالدارانو د دې همکارۍ هرکلی کړی او د کرنې ریاست او اروپایي ټولنې د هڅو څخه یې خوښي څرګنده کړې.
د مالدارۍ سکتور روغتیا ته ځانګړې پاملرنه د څارویو د ناروغیو مخنیوي او د محصولاتو د ښهوالي لپاره اړینه ده. د یادونې وړ ده چې یوه اونۍ وړاندې د کندهار غورک، پنجوايي او ارغستان ولسوالیو کې هم ۱۳زره کوچنیو څارویو ته ورته واکسین تطبیق شوی و.
