د کرنې وزارت د ځنګلونو لوی رییس د کندهار منګالي فارم څخه لیدنه وکړه
۲۹ مرغومې ۱۴۰۳ھ.ش
۱۸ رَجَب المُرَجَّب ۱۴۴۶ه.ق
د کرنې، اوبولګولو او مالدارۍ وزارت د ځنګلونو لوی رییس ملا سراج الحق میرویس ذاکري کندهار ولایت ته دخپل سفر په ترڅ کې په داسې حال کې، چې د کندهار دکرنې ریاست د طبیعي سرچینو آمریت چارواکو یې ملتیا کوله د منګالي فارم څخه لیدنه وکړه او د یاد فارم هر اړخیزې چارې یې وکتلې.
د لیدنې پر مهال د منګالي فارم د ودانیزو چارو، قوریو، څلورو خواوو ته احاطه شوي دېوال او د فارم عمومي وضعیت ارزونه وشوه. د ځنګلونو لوی رییس ملا سراج الحق میرویس ذاکري د یاد فارم پر ښه روزنې او ساتنې ټینګار وکړ او زیاته یې کړه، چې د منګالي فارم باید په غوره توګه مدیریت شي، ترڅو د فارم د ظرفیت لوړولو له لارې د هېواد نورو ولایتونو لپاره هم نیالګي تولید شي.
په دې لیدنه کې د منګالي فارم مسؤلینو او د کندهار دکرنې ریاست د طبیعي سرچینو آمر ملا عبدالباري اخند ته سپارښتنې وشوې، ترڅو د فارم مدیریت او ساتنه په اغېزناک ډول ترسره شي.
دغه راز دکرنې وزارت د ځنګلونو لوی رییس ملاسراج الحق میرویس ذاکري د کندهار کرنې، اوبو لګولو او مالدارۍ رییس الحاج مولوي فضل الباري فضلي سره هم لیدنه وکړه او د یاد فارم په پار یې اړینې پرېکړې وکړې او ټینګار وشو چې د منګالي فارم څخه په غوره ډول ساتنه او پالنه وشي.
د یادونې وړ ده، چې منګالي فارم یو روزنیز فارم دی، چې د راتلونکي کال لپاره په کې د نیالګیو روزنه پیلېږي.
