خوست کې د لومړي ځل لپاره د شين چای د کرکیلې په پار هڅې
۸ مرغومې ۱۴۰۳ه.ش
۲۶ جُمَادَى الثاني۱۴۴۶ه.ق
د خوست د کرنې، اوبو لګولو او مالدارۍ ریاست د کرنیزو چارو امریت د څېړنیو لوی مدیریت د شین چای په روزنه، تکثیر، ګټه اخیستنه او پروسیس پیل کړی.
یاد بوټی د ګربزو صحرا په دورمالکه سیمه کې کرل شوی او په منظم ډول ترې لیدنه او پالنه کېږي، چې دا مهال د نمونوي ودې په حالت کې دی.
د خوست دکرنې ریاست چارواکي وايي، په دې هڅه کې دي، تر څو په خوست کې د یاد بوټي کرکیله بریالۍ او دا مهم توکی په هېواد کې د ننه تولید ومومي.
شين چای په ځانګړو چاپیریالي او شرایطو کې وده کوي د کښت فکتورونه يې لکه اقلیم، لوړوالی، او د خاورې ډولونو لخوا اغیزمن کیږي. دا چې زموږ په هېواد کې شين چاي ډېر کارول کېږي خو کښت يې په نشت حساب دی، په دې برخه کې څېړنه او د یاد بوټي ترویج به د کرنې په پراختیا او د بزګرانو اقتصادي وده کې به رغنده رول ولري.
